Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 203 Hüküm no: 115 Orijinal metin no: [27a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhum Ahmed Reis b. Ali’nin terekesinden, Osman Çelebi b. Ahmed’e olan borcun ödenmesi İşbu bâ‘isüˈl-vesîka Osman Çelebi b. Ahmed mahmiye-i Galataˈya tâbi‘ Tophâneˈde Cihangir mahallesinden olup İstanköyˈde fevt olan Ahmed Reis b. Aliˈnin verâseti zevcesi Ümmühaniˈye ve anası Aynî bt. Mustafaˈya münhasıra oldukdan sonra mezkûrânın hüccet ile vekîlleri olan Hüseyin Bey b. Ali mahzarında da‘vâ edip müteveffâ-yı merkūma ikrâz ettiğim iki yüz on beş esedî guruşu kableˈl-istifâ fevt olup hatta bana deyni olduğunu huzûr-ı Müslimînˈde ikrâr ve işhâd dahi etmekle hâlâ terekesinden taleb ederim suâl olunsun dedikde gıbbeˈs-suâl veˈl-inkâr ve isre-talebiˈl-beyyine udûl-ı ricâlden el-Hâc Ali b. el-Hâc Sâdık ve Ali Çelebi b. Ahmed li-ecliˈş-şehâde meclis-i şer‘a hâzırân olup isreˈl-istişhâd fiˈl-hakīka müteveffâ-yı mezbûr hayatında müdde‘î-i mezbûra karz iki yüz on beş esedî guruş deynim vardır deyü huzûrumuzda ikrâr ve bizi işhâd eyledi bu husûsa şâhidleriz şehâdet dahi ederiz deyü edâ-i şehâdet eylediklerinde ba‘deˈt-ta‘dîl şehâdetleri makbûle oldukdan sonra müdde‘î-i mezbûr ba‘deˈt-tahlîf mûcebiyle hüküm birle ketb [olundu] mâ vaka‘a. Fiˈt-târîhiˈl-mezbûr. Şuhûdüˈl-hâl: es-Sâbıkūn