Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 203 Hüküm no: 116 Orijinal metin no: [27a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhum Ahmed Reis b. Ali Bey terekesinden, Kara Mustafa b. Musa’ya seren bahasından olan borcun ödenmesi İşbu bâ‘isüˈl-vesîka Kara el-Hâc Mustafa b. Musa tarafından husûs-ı âtîyi da‘vâya vekîl olup el-Hâc Ferhad b. Ramazan ve Yusuf Reis b. Yakub şehâdetleriyle şer‘an vekâleti sâbite olan Ali Reis b. Mustafa meclis-i şer‘de mahmiye-i Galataˈya tâbi‘ Tophâneˈde Cihangir mahallesinden olup İstanköyˈde fevt olan Ahmed Reis b. Ali Bey verâseti zevcesi Ümmühani bt. Ali ile anası Aynî bt. Mustafaˈya ve li-ebeveyn er karındaşı Mehmed Beşe ve kız karındaşları Havva ve Emineˈye münhasıra oldukdan sonra mezkûrânın vekîl-i müseccelleri olan Hüseyin Bey b. Abdülcelil mahzarında da‘vâ edip müvekkilim mezbûrun müteveffâ-yı mezbûr zimmetinde yedinden müşterâ ve makbûz bir sirenbahâsından bâkī yirmi altı guruş hakkını kableˈl-istifâ fevt olup hatta huzûr-ı Müslimînˈde ikrâr ve işhâd dahi etmekle hâlâ taleb ederim suâl olunsun dedikde gıbbeˈs-suâl veˈl-inkâr ve ba‘de talebiˈl-beyyine udûl-ı ricâlden yine şâhidân-ı mezbûrân li-ecliˈş-şehâde meclis-i şer‘a hâzırân olup isreˈl-istişhâd fiˈl-vâki‘ müteveffâ-yı merkūm Kara el-Hâc Mustafaˈya bâkī yirmi altı esedî guruş deyni vardır deyü huzûrumuzda ikrâr ve bizi işhâd eyledi biz bu husûsa şâhidleriz şehâdet dahi ederiz deyü her biri edâ-i şehâdet eylediklerinde ba‘deˈt-ta‘dîl şehâdetleri makbûle oldukdan sonra mevkūfen aleˈl-yemîn mûcebiyle hüküm birle. Fiˈt-târihi’l-mezbûr. Şuhûdüˈl-hâl: es-Sâbıkūn