Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 204 Hüküm no: 117 Orijinal metin no: [27a-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhum Ahmed Reis b. Ali’nin terekesinden, Yagob v. Sahak’a emtia bahasından olan borcun ödenmesi İşbu bâ‘isüˈr-rakīm Yagob v. Sahak nâm Ermeni meclis-i şer‘de mahmiye-i Galataˈya tâbi‘ Tophâneˈde Cihangir mahallesinden olup İstanköyˈde fevt olan Ahmed Reis b. Aliˈnin verâseti zevcesi Ümmühani bt. Ali ile anası Aynî bt. Mustafaˈya ve li-ebeveyn er karındaşı Mehmed Beşeˈye ve kız karındaşları Havva ve Emineˈye münhasıra oldukdan sonra mezkûrânın vekîl-i müseccelleri olan Hüseyin Bey b. Abdülcelil mahzarında da‘vâ edip müteveffâ-yı mezbûrda emti‘a bahâsından beş bin dört yüz otuz akçe hakkım olup kableˈl-istifâ fevt olmağla terekesinden taleb ederim suâl olunsun dedikde gıbbeˈs-suâl veˈl-inkâr ve talebüˈl-beyyine udûl-ı ricâlden Mehmed Çelebi b. Şa‘bân ve Mehmed Çelebi b. Ali li-ecliˈş-şehâde meclis-i şer‘a hâzırân olup isreˈl-istişhâd fiˈl-vâki‘ müteveffâ-yı merkūm hayâtında müdde‘î-i mezbûra beş bin dört yüz otuz akçe deynim vardır deyü huzûrumuzda ikrâr ve bizi işhâd eyledi bu husûsa şâhidleriz şehâdet dahi ederiz deyü şehâdet eylediklerinde ba‘deˈt-ta‘dîl şehâdetleri makbûle oldukdan sonra ba‘deˈt-tahlîf mûcebiyle ba‘deˈl-hükm mâ vaka‘a biˈt-taleb ketb olundu. Fiˈt-târîhiˈl-mezbûr. Şuhûdüˈl-hâl: es-Sâbıkūn