Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 209 Hüküm no: 119 Orijinal metin no: [28a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sahiba bt. Mustafa’nın, kocası merhum Karcı Halil Çelebi’nin oğlu Emrullah’a vasî tayin olduğu Medîne-i Hazret-i Ebâ Eyyûbeˈl-Ensârî mahallâtından İdris Köşkü mahallesi sükkânından iken bundan akdem vefât eden Karcıbaşı Halil Çelebi oğlu Emrullah nâm sagīrin tesviye-i umûruna mansûb vasîsi olan Kadri Ağa vesâyetinden kat‘-ı yed edip azlin ihtiyâr etmekle cânib-i şer‘den azl olunup yerine bir vasî nasbından lâ-büd olmağın sagīr-i mezbûrun vâlidesi ile ledeˈş-şerʽ istikāmet ve diyâneti ve emr u vesâyete her vechile liyâkatini udûl-ı Müslimînˈden cemm-i gafîr ve cem‘-i kesîr ihbârı ile ledeˈş-şer‘ sâbit ve müte‘ayyin olan râfiʽatüˈl-kitâb Sabiha bt. el-Hâc Mustafa nâm hatuna sagīr-i mezbûrun emvâlini hıfz ve ahvâlini zabt taraf-ı şer‘den vasî nasb ve ta‘yîn olundukda ol dahi vesâyet-i mezbûreyi kabûl ve merâsimini edâya taʽahhüd etmeğin mâ vaka‘a biˈt-taleb ketb olundu. Fiˈl-hâdî veˈl-işrîn min-Safer li-sene erba‘a ve semânîn ve elf. Şuhûdüˈl-hâl: Mustafa Efendi Kürkçübaşı imâmı, Hasan Ağa el-mütevellî bi-Kürkçübaşı, Yusuf Çelebi Çavuşzâde, Mehmed Çelebi el-müezzin, Şa‘bân Beşe b. Mehmed, Mustafa Çelebi b. Ahmed Ağa