Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 215 Hüküm no: 127 Orijinal metin no: [29a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed’in, merhum Ali Beşe b. Hacı’nın zimmetindeki cariye bahasından alacağını vasîden talep ettiği İşbu bâʽisüˈl-vesîka el-Hâc Mehmed b. Habib meclis-i şerʽ-i şerîfde mahmiye-i Galata aʽmâlinden kasaba-i Kasımpaşaˈda Yeldeğirmeni mahallesinden olup Kili kasabasında ticâret üzre iken vefât eden Ali Beşe b. Hacıˈnın verâseti zevce-i metrûkesi Havva bt. el-Hâc Hüseyin ile vâlidesi Sâliha bt. Aliˈye ve sagīr oğlu Mehmedˈe münhasıra olduğu şerʽan zâhir ve müteʽayyin oldukdan sonra sagīr-i mezbûrun tesviye-i emrine kıbel-i şerʽden mansûb vasîsi olup tereke-i müteveffâ-yı mezbûra vâziʽüˈl-yed olan ceddi el-Hâc Hüseyin b. Ali mahzarında üzerine daʽvâ ve takrîr-i kelâm müteveffâ-yı merkūmun zimmetinde yedimden müşterâ ve makbûz cinsi beynimizde ilm-i şerʽî ile maʽlûm iki câriye semenlerinden iki yüz yirmi guruş hakkım olup bin sekiz yüz akçesini hayatında alıp bâkī iki yüz beş guruşumu kableˈl-istifâ vefât edip hâl-i hayatında meblağ-ı mezbûr bana deyni olduğunu huzûr-ı Müslimînˈde ikrâr ve işhâd dahi etmişdir hâlâ vasî-i mezbûrun yedinde olan terekesinden taleb ederim suâl olunsun dedikde gıbbeˈs-suâl veˈl-inkâr ve isre-talebiˈl-beyyine udûl-ı Müslimînˈden olup kasaba-i mezbûrede vâkiʽ Kulaksız mahallesinde sâkin Debbağ Mehmed b. Hasan ve Yeniçeşme kurbünde sâkin Mustafa Beşe b. el-Hâc Behram [nâm] kimesneler li-ecliˈş-şehâde meclis-i şerʽa hâzırân [olup] isreˈl-istişhâd fiˈl-vâkiʽ müteveffâ-yı mezbûr hayatında müddeʽî-i mezbûre vech-i muharrer üzre iki câriye semenlerinden bâkī iki yüz beş guruş deynim vardır deyü huzûrumuzda ikrâr ve bizi işhâd eyledi biz bu husûsa şâhidleriz şehâdet dahi ederiz deyü her biri edâ-i şehâdet-i şerʽiyye eylediklerinde gıbbe riʽâyet-i şerâ’itiˈl-kabûl şehâdetleri makbûle oldukdan sonra müddeʽî-i mezbûr aleˈl-vechiˈl-meşrûʽ tahlîfden sonra mûcebiyle hüküm birle mâ vakaʽa biˈt-taleb ketb olundu. Fiˈl-işrîn min-Saferiˈl-hayr li-sene erbaʽa ve semânîn ve elf. Şuhûdüˈl-hâl: Mustafa Odabaşı b. Mahmud, Hasan Beşe b. Ali, Hızır Beşe b. Ali, el-Hâc Mustafa b. Ali, Hasan Beşe b. Ali, Ahmed b. Osman