Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 216 Hüküm no: 128 Orijinal metin no: [29a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Çelebi’nin, merhum babası Bağdadî Ahmed Ağa’nın bazı kişilerdeki alacaklarından olan hissesini vasîden tahsil ettiği Medîne-i Hazret-i Ebâ Eyyûbe’l-Ensârî aleyhi rahmetüˈl-Bârî mahallâtından Câmiʽ-i Kebîr mahallesinde sâkin iken bundan akdem vefât eden Bağdâdî Ahmed Ağaˈnın sulbî kebîr oğlu Mehmed Çelebi meclis-i şerʽ-i şerîfde müteveffâ-yı mezbûrun sulbî sagīr oğulları Mustafa ve Halil ve sagīre kızı Âişeˈnin tesviye-i emirlerine kıbel-i şerîʽat-i mergūbeden mansûb vasîleri olan işbu sahibüˈl-vesîka zahrüˈl-eşbâh Ali Efendi b. Hızır mahzarında ikrâr ve takrîr-i kelâm edip babam müteveffâ-yı mezbûrun defter-i kassâm-ı askerîde mukayyed olup Tâbih Mehmed zimmetinde olan on beş buçuk guruş ve Kaymak Çavuş zimmetinde üç bin akçe ve Saraylı Fatma Hoca zimmetinde bir defʽa sekiz esedî guruş ve bir defʽa yirmi dört esedî guruş ki cemʽan yüz dört guruş asl-ı mâl ve altı senede müctemiʽ mineˈl-hüccet-i şerʽiyyeden bâkī kırk guruş ve İstol nâm zimmî zimmetinde yüz esedî guruş benimle karındaşlarım sıgār-ı mezkûrîne isâbet etmeğin zikirleri mürûr eden meblağ yedi sehimden iʽtibâr olunup sihâm-ı mezbûrede benim iki sehim hissem merkūm Tabetçi Mehmedˈden dört guruş ve elli akçe ve mezkûr Kaymak Çavuşˈdan sekiz yüz elli altı akçe ve mezbûre Saraylıˈdan kırk buçuk esedî guruş ve yüz on akçe asl-ı mâl ve murâbaha ve mezkûr İstolˈdan yirmi buçuk esedî guruş ve sekiz akçe isâbet etmekle hâlâ vasî-i merkūm Ali Efendi yedinden sâlifüˈz-zikr hisselerimi biˈt-tamam veˈl-kemâl alıp kabz eyledim baʽdeˈl-yevm mârrüˈz-zikr zimemlerde alâka ve medhalim kalmadı dedikde gıbbeˈt-tasdîkiˈl-muʽteber mâ hüveˈl-vâkiʽ biˈt-taleb ketb olundu. Fiˈt-tâsiʽ veˈl-işrîn min-Saferiˈl-hayr li-sene erbaʽa ve semânîn ve elf. Şuhûdüˈl-hâl: Mefharüˈl-kuzât Mustafa Efendi b. Mehmed el-kādî, Zahrüˈl-eimme Mehmed Efendi b. Ömer el-imâm bi-Câmi‘-i Kebîr, Umdetüˈl-eimme Mehmed Efendi b. Ömer imâm bi-Câmiʽ-i İbrahim (…), Mahmud Ağa b. Abdullah, Halil Çelebi b. (…)