Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 217 Hüküm no: 129 Orijinal metin no: [29b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Çelebi’nin, merhum babası Bağdadî Ahmed Ağa’dan intikal eden ev hisselerini diğer küçük kardeşleri için vasiye sattığı Medîne-i Hazret-i Ebâ Eyyûbeˈl-Ensârî mahallâtından Câmi‘-i Kebîr mahallesinde sâkin iken bundan akdem vefât eden Bağdâdî Ahmed Ağaˈnın sulbî kebîr oğlu Mehmed Çelebi meclis-i şerʽ-i şerîfde müteveffâ-yı mezbûrun sulbî sagīr oğulları Mustafa ve Halil ve sagīre kızı Âişeˈnin tesviye-i emirlerine min-kıbel-i şerʽü’l-hatîr mansûb vasîleri olan işbu sahibüˈl-vesîka zahrüˈl-eşbâh Ali Efendi b. Hızır mahzarında ikrâr ve takrîr-i kelâm edip mahalle-i mezbûrede vâkiʽ bir tarafdan benim vasî-i merkūmun sıgār-ı mezkûrîn içün biˈl-iştirâk iştirâ eylediğim mülk menzile ve bir tarafdan Şeyhî Çelebi veresesi mülklerine ve bir tarafdan Nesli Hatun mülküne ve bir tarafdan baʽzan Baki Hoca Mescidiˈne ve baʽzan tarîk-i hâssa müntehî birbirine muttasıl iki bâb fevkānî odaları ve tahtında bir kilâr ve bir mikdâr arsayı müştemil [müştemil] mülk menzil babam müteveffâ-yı mezbûrun vefâtından sonra mülk ve hakkı olmağla biˈl-ırşiˈş-şerʽî benimle karındaşlarım mezbûrûna intikāl ve isâbet ettikden sonra yedi sehimden iʽtibâr olunup sihâm-ı mezbûrenin ikişer sehim bana ve karındaşlarım mezbûrâna ve bir sehmi kız karındaşım merkūm Âişeˈye isâbet etmekle menzil-i mezbûrede olan iki sehm hissem âhara beyʽ murâd edip lâkin hisse-i mezkûrem ifrâz olunmak mümkün olmayıp kābil-i taksîm olmamağla vasî-i merkūm sıgār içün mallarıyla iştirâ murâd etmeğin mahâll-i mezbûrede sâkin zahrüˈl-eimme Mehmed Efendi b. Ömer ve diğer Mehmed Efendi b. İbrahim ve fahrüˈl-kuzât Mustafa Efendi b. Mehmed ve Mehmed Ağa b. Abdullah ve Halil Çelebi b. Hudâverdi nâm kimesneler vech-i muharrer üzre işbu zikrolunan menzil kābil-i taksîm olmayıp sâlifüˈz-zikr iki sehim hisse sıgār-ı mezkûrîne iştirâ ve her vechile enfaʽ olduğunu haber verdiklerinden sonra zikrolunan sehm hissemi yüz beş esedî guruşa vasî-i mezbûre tarafından îcâb ve kabûlü hâvî beyʽ u bâtt-ı sahîh-i şerʽî ile beyʽ ve teslîm ol dahi biˈl-vesâye sıgār-ı mezbûrîn içün mallarıyla iştirâ ve tesellüm eyledikden sonra semeni olan meblağ-ı mezbûru vasî-i merkūm yedinden ahz u kabz eyledim baʽdeˈl-yevm zikrolunan iki sehm hissem sıgārın mülküdür keyfe mâ yeşâ mutasarrıf olsunlar dedikde gıbbeˈt-tasdîk mâ vakaʽa biˈt-taleb ketb olundu. Fiˈl-yevmiˈt-tâsiʽ veˈl-işrîn min-Saferiˈl-hayr li-sene erbaʽa ve semânîn ve elf. Şuhûdüˈl-hâl: Ahmed Çelebi b. Mehmed, Muslı Çelebi b. Receb, Abdullah Halîfe b. Abdullah el-müezzin, Salih Çelebi b. Ferhad, İsa Bey b. Halil, Osman b. Ahmed