Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 218 Hüküm no: 130 Orijinal metin no: [29b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Debbağ Mehmed’in, merhum Ali Beşe b. Hacı’daki alacağını varislerden talep ettiği İşbu sahibüˈl-vesîka Debbağ el-Hâc Mehmed b. Mehmed meclis-i şerʽ-i hatîrde Galata kazâsına tâbiʽ kasaba-i Kasımpaşaˈda Yeldeğirmeni mahallesinden olup Kili kasabasında fevt olan Ali Beşe b. Hacıˈnın verâseti zevce-i metrûkesi Havva bt. el-Hâc Hüseyin ile anası Sâliha bt. Aliˈye ve sagīr oğlu Mehmedˈe münhasıra olduğunu şerʽan zâhir ve müteʽayyin oldukdan sonra sagīr-i mezbûrun tesviye-i emrine [mansûb] şerʽden mansûb vasîsi olup tereke-i müteveffâ-yı mezbûra vâziʽüˈl-yed olan ceddi el-Hâc Hüseyin b. Ali mahzarında üzerine daʽvâ ve takrîr-i kelâm edip müteveffâ-yı mezbûrun zimmetinde yedimden müşterâ ve makbûz cinsi ve adedi beynimizde ilm-i şerʽî ile maʽlûm meşîn bahâsından baʽde küllî hesâb bâkī yüz esedî guruş hakkımıkableˈl-ahz vefât edip hâl-i hayatında meblağ-ı mezbûr bana deyni olduğunu alâ-ruûsiˈl-işhâd ikrâr ve işhâd dahi etmekle hâlâ vasî-i mezbûrun yedinde olan terekesinden taleb ederim suâl olunsun dedikde gıbbeˈs-suâl veˈl-inkâr ve baʽde talebiˈl-beyyine udûl-ı Müslimînˈden olup kasaba-i mezbûrede İbâdullâh mahallesinde sâkin Ahmed b. İbrahim ve el-Hâc Hüsrev mahallesinde sâkin Mehmed b. Mustafa nâm kimesneler li-ecliˈş-şehâde meclis-i şerʽa hâzırân olup isreˈl-işhâd fiˈl-hakīka müteveffâ-yı mezbûr hayatında vech-i muharrer üzre müddeʽî-i mezbûra meşîn semeninden baʽde küllî hesâb bâkī yüz esedî guruş deynim vardır deyü huzûrumuzda ikrâr ve bizi işhâd eyledi biz bu husûsa şâhidleriz şehâdet dahi ederiz deyü her biri edâ-i şehâdet-i şerʽiyye eylediklerinde gıbbe riʽâyet-i şerâ’itiˈl-kabûl şehâdetleri makbûle oldukdan sonra müddeʽî-i mezbûr baʽdeˈt-tahlîf mûcebiyle baʽdeˈl-hükm mâ vakaʽa biˈt-taleb ketb olundu. Fiˈl-âşir min-şehri Rebîʽiˈl-evvel li-sene erbaʽa ve semânîn ve elf. Şuhûdüˈl-hâl: Abdülbaki b. Mustafa, el-Hâc Mehmed b. Habib, Rasûl Beşe b. Ali, Ahmed b. Osman