Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 219 Hüküm no: 131 Orijinal metin no: [29b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmihan b. Abdullah’ın, merhum kocası Suyolcu Mehmet zimmetindeki mehrini vasîden talep ettiği Medîne-i Hazret-i Ebâ Eyyûbeˈl-Ensârî mahallâtından Nazperver mahallesi sükkânından iken vefât eden Suyolcu Mehmed b. Abdülkerim nâm kimesne verâseti zevce-i metrûkesi İsmihan b. Abdullah nâm hatuna vasîleri sagīr oğlu İbrahimˈe ve sulbiye kızları Hadîce ve Havva nâm sagīr ve sagīrelere münhasıra olduğu şerʽan mütehakkık oldukdan sonra mezbûre İsmihan meclis-i şerʽde sıgār-ı mezbûrûnun tesviye-i emirlerine kıbel-i şerʽden mansûb vasîleri ammisi mahzarında üzerine daʽvâ ve takrîr-i kelâm edip zevcim müteveffâ-yı mezbûr beni kableˈl-iʽtâk beynimizde mukarrer ve maʽkûdun-aleyh olan bin akçe mehr-i müeccelim olup kableˈl-edâ vefât etmekle hâlâ meblağ-ı mezbûru terekesinden taleb ederim suâl olunsun dedikde gıbbeˈs-suâl ve akībeˈl-inkâr ve isre talebiˈl-beyyine udûl-ı ricâl-i Müslimînˈden İbrahim b. Mustafa ve İbrahim b. Mustafa nâm kimesneler li-ecliˈş-şehâde meclis-i şerʽa hâzırân olup isreˈl-istişhâd fiˈl-hakīka müteveffâ-yı mezbûr Mehmed b. Abdülkerim baʽdeˈl-iʽtâk cânibinde mezbûre İsmihanˈı on bin akçe mehr-i müeccel mukābelesinde kendüye akd-i nikâh eyledi biz bu husûsa şâhidiz şehâdet dahi ederiz deyü her biri edâ-i şehâdet eylediklerinde gıbbe riʽâyet-i şerâ’itiˈl-kabûl şehâdetleri makbûle olmağın gıbbeˈt-tahlîf mûcebiyle baʽdeˈl-hükm biˈt-taleb ketb olundu. Fiˈl-yevmiˈl-hâmis mineˈl-Muharremiˈl-harâm li-sene erbaʽa ve semânîn ve elf. Şuhûdüˈl-hâl: Ömer Efendi b. İvaz, Yusuf b. Ali, Kaytas b. Abdullah, Ramazan b. Kâmil, es-Seyyid Abdullah b. Halil, Osman b. Halil ve gayruhum