Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 219 Hüküm no: 132 Orijinal metin no: [30a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Çelebi’nin, merhum babası Bağdadî Ahmed Ağa’dan intikal eden ev hisselerini diğer küçük kardeşleri için vasiye satıp bedelini tahsil ettiği Medîne-i Hazret-i Eyübˈde mahallâtından Câmi‘-i Kebîr mahallesinde sâkin iken bundan akdem vefât eden Bağdâdî Ahmed Ağaˈnın kebîr oğlu Mehmed Çelebi meclis-i şerʽ-i hatîrde müteveffâ-yı mezbûrun sagīr oğulları Mustafa ve Halil ve sagīre kızı Âişeˈnin tesviye-i emirlerine kıbel-i şerʽden mansûb vasîleri olan zahrüˈl-aʽyân Ali Efendi b. Hızır mahzarında ikrâr ve takrîr-i kelâm edip mahalle-i mezbûrede vâkiʽ bir tarafdan müteveffâ-yı mezbûr mülküne ve iki tarafdan Topal Receb veresesi mülklerine ve bir tarafdan tarîk-i âmma müntehî bir bâb fevkānî sagīr odayı ve bi’r-i mâ’ı ve arsayı müştemil mülk menzili babamız müteveffâ-yı merkūmun vefâtından sonra ben vasî ve mezbûr sıgār-ı mezbûrîn içün mallarıyla semen-i maʽlûma iştirâ ve kabz eylediğim menzil yedi sehimden iʽtibâr olunup sihâm-ı mezbûreden benim iki sehim hisseme isâbet eden menzil ifrâz olunmak mümkün olmayıp kābil-i taksîm olmamağla vasî-i mezbûr sıgār içün iştirâ murâd etmekle mahalle-i mezbûrede sâkin Mustafa Efendi b. Mehmed el-kādî Mehmed Efendi b. Ömer el-imâm ve diğer Mehmed Efendi b. İbrahim el-imâm ve Halil Çelebi b. Hudâverdi nâm kimesneler vech-i muharrer üzre zikrolunan iki sehim hisseyi iştirâ sıgāra her vechile enfaʽ olduğunu haber verdiklerinden sonra sâlifüˈz-zikr iki sehim hissemi yirmi esedî guruşa tarafeynden îcâb ve kabûlü hâvî beyʽ-i bâtt-ı sahîh-i şerʽî ile beyʽ ve teslîm ol dahi biˈl-vesâye mal-ı sagīr ile iştirâ ve kabz ve tesellüm eyledikden sonra semeni olan meblağ-ı mezbûru vasî-i merkūm yedinden ahz u kabz eyledim baʽdeˈl-yevm zikrolunan iki sehim hisseyi sıgār-ı mezkûrînin mülk-i müşterâsıdır hasbe mâ yeşâ’ mutasarrıf olsunlar dedikde gıbbeˈt-tasdîkiˈl-muʽteber mâ vakaʽa biˈt-taleb ketb olundu. Fiˈt-tâsiʽ veˈl-işrîn min-Saferiˈl-hayr li-sene erbaʽa ve semânîn ve elf. Şuhûdüˈl-hâl: Mehmed Ağa b. Abdullah, Ahmed Çelebi b. Mehmed, Muslı Çelebi b. Receb, Abdullah Halîfe b. Abdullah el-müezzin, Tekir Mustafa Çelebi b. Mehmed, Salih Çelebi b. Ferhad