Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 227 Hüküm no: 137 Orijinal metin no: [31a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhum Kasab Ali Beşe b. Habib’den varislere intikal eden yarım hisse kasab dükkânının, ortağı Ahmed Beşe’ye satıldığı Mahrûse-i Galata hâricinde Şahkulu mahallesinde sâkin iken bundan akdem vefât eden Kasab Ali Beşe b. Habib nâm kimesnenin verâseti zevce-i metrûkesi Fatma bt. Hüseyin nâm hatun ile vâlidesi Gevher bt. Şa‘bân nâm hatuna ve li-ebeveyn kız karındaşı Fatma nâm hatuna münhasıra olduğu şerʽan zâhir ve müteʽayyin oldukdan sonra merkūme Fatmaˈnın vekîl-i müsecceli olan İmâm Ahmed Efendi ve mezbûre Gevherˈin dahi vekîl-i müsecceli Mahmud Çelebi b. Mehmed ve mezkûre Fatmaˈnın vekîl-i müsecceli olan el-Hâc Murad b. Mehmed meclis-i şerʽ-i hatîrde işbu bâʽisüˈl-vesîka Ahmed Beşe b. Murad mahzarında her biri ikrâr ve takrîr-i kelâm edip mahrûse-i mezbûreye tâbiʽ kasaba-i Beşiktaş iskelesi önünde Deve Meydânı demekle maʽrûf meydânda vâkiʽ bir tarafdan koyun kasabı el-Hâc Osman dükkânına ve üç tarafdan tarîk-i âmma müntehî bir kasab dükkânının nısfı müteveffâ-yı mezbûrun ve nısf-ı âharı işbu Ahmed Beşeˈnin mülkü olup müteveffâ-yı merkūmun mülkü ve hakkı olan nısf dükkân müteveffâ-yı mezbûrun vefâtından sonra müvekkilelerimiz mezbûrâna biˈl-ırsiˈş-şerʽî intikāl ve isâbet etmekle hâlâ vekâletim hasebiyle zikrolunan nısf dükkânı merkūm Ahmed Beşeˈye yirmi iki esedî guruşa tarafeynden îcâb ve kabûlü hâvî ve beyʽ-i bâtt-ı sahîh-i şerʽî ile beyʽ ve teslîm ol dahi iştirâ ve tesellüm eyledikden sonra semeni olan meblağ-ı mezbûr yirmi iki esedî guruşu her birimiz biˈl-vekâle bi-kaderiˈl-hisâs merkūm Ahmed Beşe yedinden tamamen ahz u kabz [31b] eyledik baʽdeˈl-yevm zikrolunan dükkân biremmetihâ?mezbûr Ahmed Beşeˈnin mülk-i müşterâsıdır keyfe mâ yeşâ’ mutasarrıf olsun dediklerinde gıbbeˈt-tasdîkiˈş-şerʽî mâ vakaʽa biˈt-taleb ketb olundu. Fiˈs-sâbiʽ-i aşer min-şehri Rebîʽiˈl-evvel li-sene erbaʽa ve semânîn ve elf. Şuhûdüˈl-hâl: Ömer Efendi b. Ali, İsa Bey b. Halil, Hüseyin Çelebi b. Ali, Ahmed b. Osman, Mehmed Beşe b. Abdullah