Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 261 Hüküm no: 157 Orijinal metin no: [36b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatma ve Ayşe’nin, merhum Ali Reis b. Ahmed’deki alacaklarını varislerinden talep ettikleri Medîne-i mezbûrûn sükkânından olup râfi‘-i hâzeˈl-kitâb Beşir b. Ömer nâm kimesne meclis-i şer‘-i hatîrde mahrûse-i Galata a‘mâlinden kasaba-i Tophâneˈde Cihangir mahallesi sükkânından olup bundan mukaddem Azak nâm mahâlde vefât eden Ali Reis b. Ahmedˈin verâseti zevcât-ı metrûkâtı Havva ve Fatma ve Âişe Hatunlar ile sulbî sagīr oğulları Hasan ve Ahmed ve İbrahimˈe münhasıra olduğu şer‘an zâhir ve mütehakkık oldukdan sonra merkūme Fatma ve Âişe taraflarından husûs-ı câ’iˈz-zikre vekîl-i müseccelleri ve sıgār-ı mezbûrînin tesviye-i emirlerine cânib-i şer‘den mansûbe vasîleri olan mezkûre mahzarında üzerine da‘vâ ve takrîr-i kelâm müteveffâ-yı mezbûr zimmetinde cihet-i deyn-i şer‘îden otuz üç kıt‘a esedî guruş hakkım olup kableˈl-edâ vefât etmekle hâlâ meblağ-ı mezbûru taleb ederin suâl olunsun dedikde gıbbeˈs-suâl ve akībeˈl-inkâr ve isre-talebiˈl-beyyine udûl-ı Müslimînˈden İslâm Yazıcı b. Ali ve Ahmed b. Ali nâm kimesneler li-ecliˈş-şehâde meclis-i şer‘a hâzırân olup istişhâd olunduklarında fiˈl-hakīka müdde‘î-i mezbûr müteveffâ-yı mezkûr Ali Reis hayatında otuz üç esedî guruş idâne ve teslîm ol dahi meblağ-ı merkūmu vech-i meşrûh üzre istidâne ve kabz eyledi biz bu husûsa şâhidiz şehâdet dahi ederiz deyü her biri edâ-i şehâdet eylediklerinde gıbbe ri‘âyeti şerâ’itiˈl-kabûl şehâdetleri makbûle oldukdan sonra ba‘deˈt-tahlîfiˈl-mu‘teber mûcebiyle hükmolunup mâ vaka‘a biˈt-taleb ketb olundu. Fiˈl-yevmiˈs-sânî veˈl-işrîn min-şehri Rebî‘iˈl-âhir li-sene erba‘a ve semânîn ve elf. Şuhûdüˈl-hâl: Ali Bey b. Yusuf, Hüseyin b. Ali, Ahmed b. Abdullah, Mahmud b. Hüseyin