Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 279 Hüküm no: 170 Orijinal metin no: [40a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhum Ali Reis b. Ahmed’in techiz, tekfin ve hayratı için vasî tayin edilen Yedekçi Ahmed Beşe’nin, belirlenen paranın terekeden ayrılarak gerekli harcamaların yapılmasını talep ettiği İşbu bâ‘isüˈl-kitâb Yedekci Ahmed Beşe b. Mustafa meclis-i şer‘-i hatîrde mahmiye-i Galata muzâfâtından kasaba-i Tophâneˈde Cihangir mahallesinden olup Azakˈda vefât eden Ali Reis b. Ahmedˈin verâseti zevcât-ı metrûkâtı Havva bt. Abdullah ve Âişe bt. Abdullah ve Fatma bt. Abdulvehhab nâm hatunlar ile sulbî sagīr oğulları Hasan ve İbrahim ve Ahmedˈe münhasıra olduğu şer‘an zâhir ve müte‘ayyin oldukdan sonra sıgār-ı mezkûrînin tesviye-i emirlerine kıbel-i şer‘den mansûb vasîleri olan vâlideleri mezbûre Havva mahzarında üzerine da‘vâ ve takrîr-i kelâm edip müteveffâ-yı mezbûr maraz-ı mevtinde terekemden üç bin akçe ifrâz olunup bi-emrillâhi te‘âlâ vefâtımdan sonra meblağ-ı mezbûr techîz ve tekfîn ve vücûh-ı hayrâta sarf oluna deyü vasiyyet ve ifrâz ve tenfîze beni vasî-i muhtâr nasb ve ta‘yîn ve ben dahi ba‘deˈl-ihtiyâr veˈl-kabûl musırrân fevt olmağla hâlâ terekesine vâzi‘uˈl-yed olan vasî-i mezbûre Havvaˈdan taleb ederim suâl olunsun dedikde gıbbeˈs-suâl veˈl-inkâr mezbûr Ahmed Beşeˈden müddeˈâsına beyyine taleb olundukda udûl-ı Müslimînˈden İslâm Yazıcı b. Ali ve Ahmed Beşe b. Ali nâm kimesneler li-ecliˈş-şehâde meclis-i şerʽa hâzırân olup isreˈl-istişhâd fiˈl-hakīka müteveffâ-yı mezbûr maraz-ı mevtinde terekemden üç bin akçe ifrâz olunup bi-emrillâhi teʽâlâ vefâtımdan sonra meblağ-ı mezbûr techîz ve tekfîn ve vücûh-ı hayrâta sarf oluna deyü vasiyyet ve tenfîzine bizim huzûrumuzda merkūm Ahmed Beşeˈyi vasî-i muhtâr nasb ve taʽyîn ol dahi baʽdeˈl-ihtiyâr veˈl-kabûl musırratan fevt olup terekesinin sülüsü dahi vasiyet-i mezkûreyi müsâʽid olmağla vasî-i mezbûr Ahmed Beşe içün taleb vardır biz bu husûsa şâhidleriz şehâdet dahi ederiz deyü her biri edâ-i şehâdet-i şerʽiyye eylediklerinde isre-riʽâyet-i şerâyitiˈl-kabûl şehâdetleri makbûle oldukdan sonra mûcebiyle baʽdeˈl-hükm mâ vakaʽa biˈt-taleb ketb olundu. Fiˈl-hâmis veˈl-işrîn min-şehri Rebîʽiˈl-âhir li-sene erbaʽa ve semânîn ve elf. Şuhûdüˈl-hâl: el-Hâc Veli b. Ahmed, Ali Yazıcı b. Mehmed, Üveys Beşe b. Ali, Eyüb Beşe b. Eyüb