Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 286 Hüküm no: 180 Orijinal metin no: [41b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eyüb Beşe b. Mehmed’in, merhum Ali Reis b. Ahmed’e ait şaykanın yarım hissesisini varislerinden satın aldığı Mahmiye-i Galataˈya tâbiʽ kasaba-i Tophâneˈde Cihangir mahallesi sâkinlerinden olup bundan akdem Karadenizˈde Azak nâm mahâlde fevt olan Ali Reis b. Ahmedˈin verâseti zevcât-ı metrûkâtı Fatma bt. Abdullah ve Âişe bt. Abdulvehhab ve Havva bt. Abdulmennan nâm hatunlar ile sulbî sagīr oğulları Ahmed ve Hasan ve İbrahimˈe münhasıra olduğu şerʽan zâhir ve müteʽayyin oldukdan sonra mezkûrât Fatma ve Âişe ve Havva ile sıgār-ı merkūmînin tesviye-i emirlerine vasî-i muhtârları olan zahrüˈl-eşbâh el-Hâc Beşir Bey b. İsmail meclis-i şerʽ-i hatîr-i lâzımüˈt-tevkīrde işbu sahibüˈl-kitâb Eyüb Beşe b. Mehmed mahzarında her biri asâleten ve vesâyeten ikrâr ve takrîr-i kelâm edip müteveffâ-yı mezbûrun düyûn-ı kesîre-i müsbetesi olup cümle muhallefâtından olan yirmi iki zirâʽ şayka taʽbîr olunur sefînenin altı lengerî demiri ve beş komane ve bir sandal ve beş sagīr ve kebîr müstaʽmel yelken ve bir orta kazganı ve bir tencere ve bir kahve ibriği ve dört sahan vesâir âlât-ı mevcûdesinin nısf-ı şâyiʽi işbu Ali Yazıcı nâm kimesnenin ve nısf-ı şâyiʽi müteveffâ-yı mezbûrun mülkü olmağla zarûret-i düyûn-ı mezkûre içün beyʽ lâzım gelmeğin biˈl-izniˈş-şerʽî nısf hisse-i mezbûre hâssa münâdîlerinden el-Hâc Mustafa b. Bayram yediyle sûk-ı sultânîde müddet-i medîde beyneˈt-tâlibîn nidâ ve müzâyede ve baʽde inkıtâʽıˈr-rağbe merkūm Eyüb Beşe üzerinde dört yüz elli esedî guruşa karâr ve ziyâde ile tâlib-i âhar bulunmadığından mâʽadâ meblağ-ı mezbûr dört yüz elli esedî guruş sâlifüˈz-zikr nısf sefîne ve nısf âlât-ı mevcûde-i mezkûrenin semen-i misli olduğunu zeyl-i vesîkada isimleri muharrer olan sıkāt-ı sahîhüˈl-kelimât-ı Müslimîn haber verdiklerinden sonra her birimiz asâleten ve vesâyeten zikirleri sebk eden nısf-ı şâyiʽi sefîne ve âlât-ı mevcûde-i mezkûreyi sırf düyûn-ı müsbete-i merkūme içün mezbûr Eyüb Beşe tarafından îcâb ve kabûlü hâvî beyʽ-i bâtt-ı sahîh-i şerʽî ile meblağ-ı mezbûr dört yüz elli esedî guruşa beyʽ ve teslîm edip ol dahi iştirâ ve kabûl ve tesellüm eyledikden sonra semeni olan meblağ-ı mezbûr dört yüz elli esedî guruşu mezkûr Eyüb Beşe yedinden asâleten ve vesâyeten biˈt-tamam ahz u kabz eyledim baʽdeˈl-yevm mârrüˈz-zikr nısf-ı şâyiʽi sefîne ve âlât-ı mevcûde-i mezkûre merkūm Eyüb Beşeˈnin mülk-i müşterâsıdır hasbe mâ yeşâ’ mutasarrıf olsun dediklerinde gıbbeˈt-tasdîk mâ vakaʽa biˈt-taleb ketb olundu. Fiˈl-yevmiˈs-sânî aşer min-Cumâdelûlâ li-sene [10]84. Şuhûdüˈl-hâl: el-Hâc Veli b. Ramazan, el-Hâc Ahmed Beşe b. Veli, Ali Yazıcı b. Ahmed, el-Hâc Ahmed b. Mehmed, Veli Yazıcı b. Mehmed, Hüseyin b. Abdullah, İslâm Yazıcı b. Ali, Süleyman Beşe b. Osman, Kara Hüseyin b. Mehmed, Ali Bey b. Halil