Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 287 Hüküm no: 181 Orijinal metin no: [42a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eyüb Beşe b. Mehmed’in, merhum Ali Reis b. Ahmed’in zimmetindeki alacağını varislerinden talep ettiği Mahrûse-i Galata aʽmâlinden kasaba-i Tophâneˈde Cihangir mahallesi sükkânından râfiʽ-i hâzeˈl-kitâb Eyüb b. Mehmed meclis-i şerʽ-i hatîr-i lâzımüˈt-tevkīrde mahalle-i mezbûre sükkânından olup Karadenizˈde Azak nâm mahâlde bundan akdem vefât eden Ali Reis b. Ahmedˈin sulbî sagīr oğulları Hasan ve Ahmed ve İbrahimˈin tesviye-i emirlerine kıbel-i şerîʽat-i mergūbeden mansûbe vasîleri ve vâlideleri olan Havva bt. Abdullah nâm hatun mahzarında üzerine daʽvâ ve takrîr-i kelâm edip târih-i kitâbdan bir sene mukaddem mâlımdan müteveffâ-yı mezbûr Ali Reis yedine bi-tarîkıˈl-mudârebetiˈş-şerʽiyye altmış Efrenci altın ile kırk kıtʽa esedî guruş defʽ ve teslîm ol dahi meblağ-ı mezbûru vech-i muharrer üzre ahz u kabz edip kableˈd-defʽ veˈt-teslîm vefât etmekle hâlâ meblağ-ı mezbûru tereke-i müteveffâ-yı merkūmdan taleb ederim suâl olunsun dedikde gıbbeˈs-suâl ve akībeˈl-inkâr ve isre-talebiˈl-beyyine udûl-ı Müslimînˈden olup mahalle-i mezbûre sükkânından Ali Yazıcı b. Mustafa ve Mehmed Yazıcı b. Mehmed nâm kimesneler li-ecliˈş-şehâde meclis-i şerʽa hâzırân olup istişhâd olunduklarında fiˈl-hakīka târih-i kitâbdan bir sene mukaddem işbu müddeʽî Eyüb b. Mehmed müteveffâ-yı mezbûr Ali Reis yedine mâlımdan bi-tarîkıˈl-mudârebetiˈş-şerʽiyye altmış Efrencî altın ile kırk kıtʽa esedî guruş defʽ ve teslîm ol dahi meblağ-ı mezbûru vech-i meşrûh üzre huzûrumuzda ahz u kabz eyledi biz bu husûsa şâhidiz şehâdet dahi ederiz deyü her biri edâ-i şehâdet-i şerʽiyye eylediklerinde baʽde riʽayet-i şerâyitiˈl-kabûl şehâdetleri makbûle oldukdan sonra gıbbeˈt-tahlîfiˈş-şerʽî mûcebiyle baʽdeˈl-hükm mâ vakaʽa biˈt-taleb ketb olundu. Fiˈl-yevmiˈs-sâbiʽ min-şehri Rebîʽiˈl-âhir li-sene erbaʽâ ve semânîn ve elf. Şuhûdüˈl-hâl: Mâ-sebak