Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 330 Hüküm no: 213 Orijinal metin no: [49a-1, Arapça] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hakimin babaları ölen Hamide ve Emetullah adlı çocuklara vasî atadığı Hâl-i hayatında mahmiye-i Galata muzâfâtından Kasımpaşa mahallâtından Kulaksız Ahmed mahallesinde sâkin iken bundan akdem tarîk-ı hâcda vefât eden el-Hâc Halil b. Mehmed’in Hamide ve Emetullah nâm sagīre kızlarının tesviye-i umûruna vasî lâzım olmağın, hâkim-i muvakkı‘-ı a‘lâhü el-mütevakkı‘ rızâi rabbihî ve mevlâhu, sagīreyn-i mezbûreynin müteveffâ-yı mezbûr babalarından [49b] irs-i şer‘le intikāl eden mâllarını hıfz ve hallerini zabt için evân-ı rüşd ve hadd-i bulûğlarına değin sahib-i hâze’l-kitâb es-Seyyid el-Hâc Mehmed Çelebi b. es-Seyyid Hâmid nâm kimseyi vasî nasb ü ta‘yîn eyledikde ol dahi kabûl ve hizmetini edâyı ta‘ahhüd etmeğin mâ-vaka‘a biˈt-taleb ketb olundu. Cerâ zâlike ve hurrire fî-gurreti Cumâdelûlâ li-sene erba‘a ve semânîn ve elf. Şuhûdü’l-hâl: Zahru’l-müderrisîni’l-kirâm Mustafa Efendi b. ( ), el-Hâc Mustafa Çelebi b. Mehmed, Mustafa Halîfe b. Mehmed el-müezzin, İbrahim Çelebi b. Mustafa, es-Seyyid Hüseyin b. es-Seyyid Mehmed, Mustafa Çelebi b. Mehmed, Ali Çelebi b. Halil, el-Hâc Eyüb Çelebi b. Receb