Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 331 Hüküm no: 215 Orijinal metin no: [49b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhum Halil b. Mehmed’den varislerine intikal eden ev hisselerinin varisler arasında alım satımı Mahmiye-i Galataˈya [tâbi‘] kasaba-i Kasımpaşaˈda Kulaksız Ahmed mahallesi sâkinlerinden olup bundan akdem tarîk-i hâcc-ı şerîfde vefât eden el-Hâc Halil b. Mehmedˈin verâseti zevce-i metrûkesi Şerife Fatma Hatun bt. es-Seyyid el-Hâc Mehmed Çelebi ile sülbiye sagīre kızları Hamide ve Emetullah ve li-ebeveyn er karındaşı el-Hâc İbrahim ve li-ebeveyn kız karındaşı Meryemˈe münhasıra ve tashîh-i mes’eleleri yetmiş iki sehimden i‘tibâr olunup sihâm-ı mezbûrenin dokuz sehmi zevcesi mezbûreye ve yirmi dörder sehmi kızları sagīretân-ı merkūmetândan her birine ve on sehmi er karındaşı el-Hâc İbrahimˈe ve beş sehmi kız karındaşı mezkûre Meryemˈe isâbet ve intikāl ettiği şer‘an zâhir ve müte‘ayyin oldukdan sonra kendi tarafından asâleten ve kız karındaşı mezkûre Meryem tarafından husûs-ı âtiˈz-zikre vekîl olup mezbûre Meryemˈin zâtını ma‘rifet-i şer‘ ile ârifân olan Ali Çelebi b. Mehmed ve el-Hâc Mustafa b. Mehmed şehâdetleriyle şer‘an vekâleti sâbite olan merkūm el-Hâc İbrahim vekâleten meclis-i şer‘-i hatîrde işbu sahibüˈl-kitâb merkūme Şerife Fatma Hatunˈun babası ve tarafından zikri câ’î ikrârı tasdîk-i vekîl-i şer‘îsi olup bimâ-hüve nehciˈs-sübût şer‘an vekâleti sâbite olan mezbûr es-Seyyid Mehmed Çelebi b. es-Seyyid el-Hâc ( ) mahzarında asâleten ve vekâleten ikrâr ve takrîr-i kelâm edip mahalle-i mezbûrede vâki‘ bir tarafda Emrullah Efendi Hazretleriˈnin vakfına ve bir tarafında Mutyar Hasan Çelebi mülküne ve tarafeyni tarîk-i âmma müntehî hâricde önü sulu bir bâb fevkānî oda ve mâbeyn odasını ve dâhilinde de bir bâb fevkānî oda ve bir tahtânî matbah ve bi’r-i mâ’ı ve bir kenîf ve bir mikdâr arsa-i hâliyeyi müştemil mülk menzil müteveffâ-yı mezbûrun ileˈl-vefât taht-ı yedinde ve kabza-i tasarrufunda mülkü ve hakkı olup ba‘de vefâtihî vech-i muharrer üzre biˈl-ırsiˈş-şer‘î cümlemize intikāl etmekle hâlâ kendi on sehmi hisse-i şer‘iyem ile kız karındaşı mezbûrenin beş sehm hissesini asâleten ve vekâleten müvekkile-i mezbûre Şerife Fatma Hatun on altı bin beş yüz akçeye bi-safkatin vâhidetin tarafeynde îcâb ve kabûlü hâvî bey‘-ı bâtt-ı sahîh-i şer‘î ile bey‘ ve teslîm ol dahi ba‘deˈl-iştirâ veˈt-tesellüm semeni olan meblağ-ı mezbûru vekîl-i mûmâ-ileyh yedinden biˈt-tamam ahz u kabz edip menzil-i mezbûrda benim ve kız karındaşım mezbûrenin kat‘a alâkası kalmayıp menzil-i mezbûrun dokuz sehmi ırsen ve on beş sehmi şirâen mezbûre Şerifeˈnin mülküdür hasbemâ şâ’e mutasarrıf olsun dedikde gıbbeˈt-tasdîkiˈl-mu‘teber mâ vaka‘a biˈt-taleb ketb olundu. Fiˈs-sâlis min-Cumâdelâhire li-sene erba‘a ve semânîn ve elf. Şuhûdüˈl-hâl: Mâ-sebak