Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 749 Hüküm no: 971 Orijinal metin no: [115b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Bostancı Ali’nin terekesinin beytülmâl emîninden alınıp kardeşleri Mustafa b. Receb ile Süleyman’a verilmesi Fi’l-asl vilâyet-i Rumeli’nde İskenderiye kazâsına tâbi‘ Yoros? nâm karyeden olup hâlâ müsâfiren mahmiye-i İstanbul’da ( ) mahallesinde sâkin Mustafa b. Receb nâm kimesne meclis-i şer‘-i hatîrde bi’l-fi‘l Hadîka-i hâssada bostancılar kethüdâsı ve zikr olunan hadîkada bilâ-vâris vefât eden bostancıların terekesini kabza memûr olan Ahmed Ağa b. Hüdâverdi tarafından husûs-ı âtiye vekîl olup hadîka-i mezbûrede vâki‘ Çeşme odasından Zülfikār b. Ali ve Ahmed b. Ali şehâdetleriyle şer‘an vekâleti sâbite olan Ali b. Hasan nâm kimesne mahzarında da‘vâ ve takrîr-i kelâm edip hadîka-i mezbûrda bostancı iken vefât edip terekesi ağa-yı müşârün-ileyh yedinde mazbûta olan Ali nâm kimesnenin ben li ebeveyn karındaşı olup verâseti benim ile âhar karındaşım Süleyman’a münhasıra ve hattâ müteveffâ-yı merkūm Ali hâl-i hayâtında ve kemâl-i akl [ve] sıhhatinde vech-i muharrer üzre benim için li ebeveyn karındaşımdır deyû kirâren ikrâr dahi etmişiken mûmâ-ileyh Ahmed Ağa tereke-i müteveffâ-yı mezbûrdan makbûzu olan eşyâmı taleb eylediğimde bana teslîmden imtinâ‘ eder, hâlâ vekîl-i mezbûrdan suâl olunup tereke-i müteveffâ-yı mezbûru bana teslîme tenbîh olunması matlûbumdur dedikde gıbbe’s-suâl vekîl-i mezkûr cevâbında tereke-i müteveffâ-yı mezbûrdan müvekkili müşârün-ileyh Ahmed Ağa vaz‘-ı yed eylediğini ikrâr ve lâkin vech-i meşrûh üzre müdde‘î-i merkūm müteveffâ-yı mezbûrun vârisi olduğu müvekkilimin ma‘lûmu değildir deyû verâseti inkâr edicek müdde‘î-i mezbûrdan müdde‘âsını mübeyyine beyyine taleb olundukda udûl-i müslimînden Zülfikār b. [Ali] ve Ahmed b. Ali nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-hakīka müteveffâ-yı mezbûr Ali hâl-i hayâtında ve kemâl-i akl [ve] sıhhatinde müdde‘î-i merkūm Mustafa benim için li ebeveyn karındaşımdan deyû kirâren ve mirâren huzûrumuzda ikrâr ve bizi işhâd etmişidi biz bu husûsa bu vech üzre şâhidleriz şehâdet dahi ederiz deyû edâ-i şehâdet-i şer‘iyye eylediklerinde gıbbe ri‘âyeti şerâiti’l-kabûl şehâdetleri makbûle olup mûcebince müdde‘î-i mezbûrun verâsetine hükm ve vekîl-i mezbûra müvekkil-i ağa-yı müşârün-ileyhin makbûzu olan terekesini müdde‘î-i mezbûra teslîm etmek üzre tenbîh olunup mâ vaka‘a bi’t-taleb ketb olundu. Fi’t-tâsi‘ ve’l-ışrîn min [şehri] Ramazâni’l-mübârek li sene seb‘a ve seb‘în ve elf. Şuhûdü’l-hâl: Mehmed Çelebi b. Abdullah, İbrahim Çelebi b. Ahmed, Hasan Çelebi b. Ahmed, Hasan Beşe Çukadâr.