Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 750 Hüküm no: 972 Orijinal metin no: [115b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Ağa’nın, Mustafa Ağa b. Mehmed’den Girit seferi esnasında haksız olarak aldığı parayı geri vermesi Cezîre-i Girit’de hâlâ koyun emîni olup sefere memûr olan fahrü’l-akrân Ebûbekir Ağa tarafından husûs-ı âti’l-beyâna vekîl olup vekâleti bimâ hüve tarîkü’s-sübût şer‘an sâbit olan bâ‘isü’l-kitâb Mustafa Ağa b. Mehmed nâm kimesne meclis-i şer‘-i şerîf-i Ahmedî ve mahfil-i dîn-i münîf-i Muhammedî’de işbu bin yetmiş yedi senesinde Girit seferi mühimmâtı için ihrâcı fermân olunan Ordu Ağası olan umdetü’l-emâsil ve’l-a‘yân Mehmed Ağa mahzarında üzerine da‘vâ ve takrîr-i kelâm edip kadîmden kasablar hırfetine lâzım olan ordu mühimmâtı koyun emîni yedinden [116a] teslîm olunagelip sene-i mezbûrda dahi ber vech-i kadîm hırfet-i mezbûreye lâzım olan ordu mühimmâtı müvekkilim mezbûr Ebûbekir Ağa yedinden teslîm olunup Ordu Ağası olan Mehmed Ağa kasablar hırfet ordusuna aslâ müdâhale etmeye deyû yedimize emr-i şerîf-i cihân-mutâ‘ verilip hırfetimiz ahâlîsinden orducu ta‘yîn olanlara mu‘tâd-ı kadîm üzre mühimmâtı tamâmen teslîm ettiğimizden sonra mezbûr Mehmed Ağa resm deyû benden bi gayrı hakkın iki yüz esedî guruş almışdır suâl olunup meblağ-ı mezbûrun merkūm Mehmed Ağa’dan alıverilmesi matlûbumdur deyû mazmûnu min külli’l-vücûh takrîr-i meşrûhunu nâtık tuğrâ-yı garrâ-yı sultânî ile mücellâ bin yetmiş yedi senesi Şa‘bânü’l-mu‘azzamı’nın evâhiri ile müverrah emr-i şerîf-i cihân-mutâ‘ ibrâz eyledikde gıbbe’s-suâl mezbûr Mehmed Ağa kaziyye minvâl-i muharrer üzre olup müdde‘î-i mezbûrdan bi gayrı hakkın iki yüz esedî guruş aldığını tâyi‘an ikrâr ve i‘tirâf etmeğin mûcebince meblağ-ı mezbûru müdde‘î-i mezbûra red ve teslîme merkūm Mehmed Ağa’ya tenbîh olunmağın mâ vaka‘a bi’t-taleb ketb olundu. Fî gurreti Şevvâli’l-mükerrem li sene seb‘a ve seb‘în ve elf. Şuhûdü’l-hâl: Fahrü’l-müderrisîn Ramazan Efendi, fahrü’l-a‘yân Hüseyin Ağa, fahrü’l-akrân Mehmed Çelebi b. ( ) Kethüdâ-yı muhzırân, çukadâr Hasan b. Abdullah, Hasan Çelebi b. Ahmed.