Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 751 Hüküm no: 973 Orijinal metin no: [116a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Şâkire Hatun bt. Abdullah’ın ölen oğlu Mustafa Çelebi b. Kara Çavuş Mustafa Ağa’nın, Hammâmî Mehmed Ağa’daki alacağını tahsil ettiği Husûs-ı âti’l-beyânın mahallinde tahrîri iltimâs olunmağın savb-ı şer‘-i celîl-i lâzımü’t-tebcîlden mevlânâ Ömer Efendi b. İsmail irsâl olunup ol dahi dergâh-ı âlî -dâme merci‘an li’l-e‘âlî- yeniçerileri çavuşlarından umdetü’l-a‘yân zübdetü’l-akrân Hüseyin Ağa b. Süleyman’ın Dârü’l-hilâfeti’l-aliyye Kostantıniyye el-mahmiyye mahallâtından Harrât Kemal mahallesinde vâki‘ menzillerine varıp zeyl-i rakīmde isimleri terkīm olan udûl-i müslimîn mahzarlarında akd-i meclis-i şer‘-i mübîn eyledikde mûmâ-ileyh Hüseyin Ağa’nın zevce-i menkûhası umdetü’l-muhadderât zübdetü’l-muvakkarât Şâkire Hâtun bt. Abdullah tarafından husûs-ı câ’i’l-beyâna vekîl olduğu zâtını ma‘rifet-i şer‘iyye ile ârifân müşârün-ileyh Hüseyin Ağa ile İsmail Beşe b. Ali nâm kimesne şehâdetleriyle şer‘an sâbit olan fahrü’l-akrân Ali Ağa b. Süleyman meclis-i ma‘kūd-ı mezbûrda işbu bâ‘isü’l-kitâb umdetü’l-eşbâh hammâmî Mehmed Ağa b. Yusuf nâm kimesne mahzarında bi’l-vekâle ikrâr ve takrîr-i kelâm edip müvekkilem mûmâ-ileyhâ Şâkire Hâtun hasren vârisesi olduğu sadrî oğlu merhûm Mustafa Çelebi b. Kara Çavuş Mustafa Ağa’nın müşârün-ileyh hammâmî Mehmed Ağa zimmetinde cihet-i karzdan hakkı olan bin yüz elli dört kıt‘a esedî guruşu mûmâ-ileyh hammâmî Mehmed Ağa yedinden tamâmen alıp kabz edip meblağ-ı mezbûr bin yüz elli dört kıt‘a esedî guruşdan müşârün-ileyh hammâmî Mehmed Ağa zimmetinde bir akçe ve bir habbe bâkī kalmadı dedikde gıbbe’t-tasdîki’ş-şer‘î vâki‘ hâli mevlânâ-yı mezbûr mahallinde tahrîr ba‘dehû ma‘an irsâl olunan Hasan Çelebi b. Bayram ile meclis-i şer‘-i hatîre gelip alâ vukū‘ihî inhâ ve takrîr eyledikde mâ hüve’l-vâki‘ bi’t-taleb ketb olundu. Fî selhi şehri Ramazâni’l-mübârek li sene seb‘a ve seb‘în ve elf. Şuhûdü’l-hâl: Umdetü’l-emâsil ve’l-eşbâh Ali Ağa b. Mehmed Mehter sâbıkan, fahrü’l-akrân ve’l-ekfâ İbrahim Ağa b. Mehmed Ağa, Hoca Mehmed Efendi b. Mehmed, Osman Beşe b. Hüsrev, Hoca Hayreddin İmâmı Hüseyin Efendi b. Mehmed, Mehmed Efendi b. Hasan Hâfız.