Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 751 Hüküm no: 974 Orijinal metin no: [116a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âsiye ve Âtike kardeşlerin evlerini, Hasan b. Mustafa’ya sattığı Mahmiye-i İstanbul’da Kâtib Muslihiddin mahallesinde sâkine Âsiye ve Âtike bintey Ahmed Çelebi nâm hâtunlar tarafından husûs-ı âti’l-beyâna vekîli olup mezbûretânı ma‘rifet-i şer‘iyye ile ârifân olan Veli Efendi b. Musa imâm-ı mescid-i Beyceğiz ve Hasan Çelebi b. Eyüb şehâdetleriyle şer‘an vekâleti sâbite olan Hüseyin Çelebi b. Sinan, meclis-i şer‘-i hatîr-i lâzımü’t-tevkīrde Kara Hasan Paşa hâtunu demekle ma‘rûfe Fâtıma bt. ( ) nâm hâtun tarafından husûs-ı câi’z-zikre vekîl olup şâhidân-ı mezbûrân şehâdetleriyle şer‘an vekâleti sâbite olan fahrü’l-eimme Mehmed Efendi b. Ahmed mahzarında bi’l-vekâle ikrâr ve takrîr-i kelâm edip müvekkiletân-ı mezbûretânın mülk-i mevrûsları olup mahalle-i mezkûrda vâki‘ hâriciyye ve dâhiliyye bir tarafdan Medîne-i Münevvere vakfı ve bir tarafdan Emir İmâm vakfı ve bir tarafdan yine kendi mülkleri ve bir tarafdan tarîk-i âm ile mahdûd menzilin tahtânî bir bâb odayı ve bir sofayı ve bir havlu ve kenîfi müştemil olan hâriciyyesini vekâlet-i mahkiyem hasebiyle yüz on esedî guruşa vekîl-i mezbûr Mehmed Efendi’ye bey‘-i bâtt-ı sahîh-i şer‘î ile bey‘ ve teslîm ol dahi vekâleten mezbûre Fâtıma Hâtun’un oğlunun oğlu Hasan b. Mustafa nâm sagīr için iştirâ ve kabûl ve kabz ve tesellüm eyledikden sonra semen-i mezbûr yüz on esedî guruşu müvekkilesi merkūme Fâtıma Hâtun’un malından vekîl-i mezbûr Mehmed Efendi yedinden bi’t-tamâm ve’l-kemâl müvekkiletân-ı mezbûretân için ahz u kabz eyledim ba‘de’l-yevm menzil-i mezbûrun hâriciyyesinde müvekkiletân-ı mezbûretânın alâkaları kalmadı dedikde gıbbe’t-tasdîki’ş-şer‘î vekîli mezbûr Hüseyin Çelebi menzil-i mezbûrun derkine kefâlet-i sahîha-i şer‘iyye ile kefîl olmağın mâ hüve’l-vâki‘ bi’t-taleb ketb olundu. Fi’l-yevmi’s-sânî ve’l-ışrîn min şehri Ramazâni’l-mübârek li sene seb‘a ve seb‘în ve elf Şuhûdü’l-hâl: Mustafa Efendi b. ( ) İmâm-ı mescid-i Ahmed Paşa, Mehmed Çelebi b. Bayezid Hammâmî, Süleyman Dede b. ( ), Hacı Mustafa b. Cafer, Veli b. Süleyman, Berber Hasan Çelebi b. ( ), Mustafa Çelebi b. Ömer