Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 377 Hüküm no: 254 Orijinal metin no: [58b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdullah Efendi’nin vakfa ait bir arsayı vakıf için Hüseyin Odabaşı ile karısına ev yapmaları için sattığı Mahmiye-i Galataˈya tâbi‘ kasaba-i Tophâneˈde vâki‘ Muhyiddin Efendi mahallesinde imâm olan Abdullah Efendi b. Ali nâm kimesne meclis-i şer‘-i hatîr-i lâzımüˈt-tevkīrde mahalle-i mezbûreden olup bundan akdem Yenişehirˈde vefât eden Hazînedâr İbrahim Ağaˈnın veresesinden zikri âtî menzile vâzı‘üˈl-yed oldukları şer‘an sâbit olan işbu bâ‘isüˈr-rakīm Hüseyin Odabaşı b. Ali nâm râcil ile zevcesi Emine bt. Mahmud yetmiş altı senesinde hâlâ sâkine oldukları menzil-i cedîdin yerinde galle ve tevliyeti bana meşrût bir harâbe menzil olup ta‘mîr ve meremmete taraf-ı vakfdan müsâ‘ade olmamağın nıkz-ı menzil-i mezbûru merkūm İbrahim Ağa râyicüˈl-vakt iki bin akçeye bey‘ ve teslîm edip ol dahi minvâl-i muharrer üzre iştirâ ve tesellüm eyleyip semen-i mezkûru yedinden alıp kabz ettiğimden sonra ber-vech-i muharrer mu‘anven ve mahtûm yedine temessük ve arsası üzerine müceddeden mâlıyla nefsi’çün ettiği binâ mülkü olmak vech üzre gidip izin verip temessük idevermişdim lâkin bundan esbak nıkz-ı semen-i mezbûr mislinden noksandır deyü mezbûr da‘vâ edip bu vech üzre nizâ‘ etmişdim hâlâ muslihûn tavassut edip beni mezbûrân ile on kıt‘a esedî guruş üzerine sulh eylediklerinde ben dahi vakfa enfa‘ olmağla sulh-ı mezbûru kabûl eyleyip bedel-i sulh olan meblağ-ı merkūmu vakf içün mezbûrânın yedlerinden alıp kabz eyledim dedikde gıbbeˈt-tasdîkiˈş-şer‘î mâ vaka‘a biˈt-taleb ketb olundu. Fiˈl-yevmiˈl-hâmis min-şehri Recebiˈl-ferd li-sene erba‘a ve semânîn ve elf. Şuhûdüˈl-hâl: Osman Çelebi b. Abdullah, Mustafa Çelebi b. Mehmed, el-Hâc Mehmed b. Ramazan, Ramazan b. Receb, İsa Beşe b. Halil