Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 378 Hüküm no: 255 Orijinal metin no: [58b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hazinedar İbrahim Çelebi b. Ahmed’in terekesinin, karısı Emine ile yeğeni Hüseyin Odabaşı’na ait olduğu Fiˈl-asl vilâyet-i Anadoluˈda Karahisâr-ı Sahib sancağında Penşenbih kazâsında Mübârek nâm karyeden olup hâlâ mahmiye-i Galata tevâbi‘inden kasaba-i Fındıklıˈda sâkin işbu bâ‘isüˈl-kitâb Hüseyin Odabaşı b. Ali b. Kara Nasuh nâm râcil meclis-i şer‘-i hatîr-i lâzımüˈt-tevkīrde mahmiye-i mezbûrede Muhyiddin Efendi mahallesinden olup vilâyet-i Rumeliˈnde medîne-i Yenişehirˈde bundan akdem vefât eden Hazînedâr İbrahim Çelebi b. Ahmed nâm kimesnenin kendüden sonra vefât eden Çelebi[ˈnin] sagīr oğlu Ahmedˈin vâlidesi olup muhallefâtına vâzi‘atüˈl-yed olduğu şer‘an sâbit olan Emine bt. Mahmud nâm hatun mahzarında üzerine da‘vâ ve takrîr-i kelâm edip müteveffâ-yı mezbûrun [59a] babası merkūm İbrahim Çelebiˈnin babası mezbûr Ahmed benim babam mersûm Ali li-ebeveyn karındaşlar olup babaları ismi Kara Nasuh ve anaları ismi Hundî Hatun ve maskat-ı re’sleri zikrolunan Mübârek karyesi olup ber-vech-i muharrer ben mezbûr Ahmedˈin usûbet-i nesebiye cihetinden vârisi olup terekesi ancak anası mezbûre Emine ile bana isâbet eder iken elhâletü hâzihî merkūme Emine Hatun hisseyi vermekde ta‘allül eder suâl olunsun dedikde gıbbeˈs-suâl veˈl-inkâr müdde‘î-i mezbûrdan da‘vâsına mutâbık beyyine taleb olundukda udûl-ı Müslimînˈden fiˈl-asl karye-i mezbûrede olup hâlâ kasaba-i Tophâneˈde Sakabaşı mahallesinden olan el-Hâc Mehmed b. Ramazan ve mahalle-i mezkûre Muhyiddin Efendi mahallesi sükkânından Ramazan b. Receb nâm kimesneler li-ecliˈş-şehâde meclis-i şer‘a hâzırân olup isreˈl-istişhâd fiˈl-vâki‘ müdde‘î-i mezbûr Hüseyin Odabaşıˈnın babası mezbûr Ali müteveffâ-yı mezbûr Ahmedˈin babası merkūm İbrahim Çelebiˈnin babası mezkûr diğer Ahmed li-ebeveyn karındaşlarıdır merkūmân diğer Ahmed ile Aliˈnin babaları ismi Kara Nasuhˈdur ve anaları ismi Hundî Hatundur ve maskat-ı re’sleri kazâ-i mezkûrda zikrolunan Mübârek Tepesi deyü ma‘rûf karyedir vech-i muharrer üzere müdde‘î-i merkūm Hüseyin Odabaşı müteveffâ-yı mezbûr Ahmedˈin usûbet-i nesebiye cihetinden vârisidir verâseti anası mezbûre Emine Hatun ile müdde‘î-i merkūma münhasıradır bunlardan gayrı vârisi olduğu ma‘lûmumuz değildir biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde gıbbe ri‘âyeti şerâ’itiˈl-kabûl şehâdetleri makbûle olmağın mûcebiyle ba‘deˈl-hükmiˈş-şer‘î mâ vaka‘a biˈt-taleb ketb olundu. Fiˈl-yevmiˈs-sânî min-Recebiˈl-ferd li-sene erba‘a ve semânîn ve elf. Şuhûdüˈl-hâl: Abdullah Efendi b. Ali el-imâm, Osman b. Abdullah, Mustafa Çelebi b. Mehmed, Ahmed Beşe b. Mustafa, Ali Beşe