Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 752 Hüküm no: 975 Orijinal metin no: [116a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hayder v. Mosi’nin, ölen Abdülmümin Çelebi’deki alacağı olduğuna dair davada sulh olduğu Yahud tâifesinin Kirüz cemâ‘atinden bâ‘isü’s-sifr Hayder v. Mosi nâm Yahudi meclis-i şer‘de Mahmiye-i İstanbul’da Kepenekçi Sinan mahallesinde sâkin iken vefât eden Abdülmümin Çelebi b. Mehmed Efendi’nin hasren vârisi ve tereke-i vâfiyesine vâzı‘ü’l-yed olan Sâlih Çelebi nâm kimesne mahzarında üzerine da‘vâ ve takrîr-i kelâm edip müteveffâ-yı mezbûr zimmetinde cihet-i kefâletden iki bin yüz esedî guruş ve yedimden müşterâ ve makbûz beynimizde ma‘lûm çuka ve kumaş bahâsından altı yüz esedî guruş ki cem‘an zimmetinde hakkım olan iki bin yedi yüz esedî guruşunu ecel hulûlüne kadar mukaddemâ mezbûr Sâlih Çelebi yedinden tereke-i müteveffâ-yı mezbûrdan alıp bâkī bin sekiz yüzü dahi mezbûr Sâlih Çelebi’den taleb ettiğimde muslihûn tavassut edip mezbûr Sâlih Çelebi ile beynimizde dokuz yüz esedî guruş üzerine inşâ-i akd-i sulh ettiklerinde ben dahi sulh-i mezbûru kabûl etmişdim, suâl olunup bedel-i mezbûru tereke-i müteveffâ-yı mezbûrdan bana edâya merkūm Sâlih Çelebi’ye tenbîh olunmak matlûbumdur dedikde gıbbe’s-suâl mezbûr Sâlih Çelebi cevâbında kaziyye minvâl-i muharrer üzre olup müdde‘î-i mezbûr ile vech-i muharrer üzre dokuz yüz esedî guruşa sulh olduğumdan sonra müdde‘î-i mezbûr bedel-i sulhü müteveffâ-yı mezbûrun terekesinden beynimizde ma‘lûm bahçesi bey‘ oluncaya [değin] te’hîr edecek olmuşdu dedikde mezbûr Sâlih Çelebi ecel-i şer‘î beyân edememek ile bedel-i mezbûru tereke-i müteveffâ-yı mezbûrdan müdde‘î-i mezbûra hâlâ edâya merkūm Sâlih Çelebi’ye tenbîh olunmağın mâ vaka‘a bi’t-taleb ketb olundu. Fi’l-yevmi’s-sâmin ve’l-ışrîn min şehri Ramazâni’l-mübârek li sene seb‘a ve seb‘în ve elf Şuhûdü’l-hâl: Hüseyin Beşe b. Abdullah Çukadâr, Hasan b. Mustafa, nakkaş Mehmed Çelebi b. Nasuh, Yusuf Çelebi b. Mehmed.