Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 383 Hüküm no: 257 Orijinal metin no: [59b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhum Ali Reis b. Ahmed’in çocuklarına vasî olan Beşir’in borçların ödenmesi için terekeden intikal eden arsayı Ali’ye sattığı Mahrûse-i Galata a‘mâlinden kasaba-i Tophâneˈde Cihangir mahallesi sükkânından olup bundan akdem Karadenizˈde Azak nâm mahâlde vefât eden Ali Reis b. Ahmedˈin evlâd-ı sıgārına vasî-i muhtâr olan el-Hâc Beşir b. ( ) nâm kimesne meclis-i şer‘-i hatîr-i lâzımüˈt-tevkīrde râfi‘-i hâzeˈl-kitâb el-Hâc Ali b. İsmail mahzarında biˈl-vesâye ikrâr ve takrîr-i kelâm [60a] edip vasîsi olduğumuz müteveffâ-yı mezbûr Ali Reisˈin düyûn-ı müsbetesi terekesinden ezyed olmağla terekesinden olup bey‘i lâzım gelen mahalle-i mezbûrede vâki‘ bir tarafdan Hacı Üveys kızı Âişe nâm hatun mülküne ve bir tarafda yine vasîsi olduğum Hasan ve İbrahim ve Ahmed nâm sagīrlerin mülk-i mevrûslarına ve taraf-ı râbi‘i tarîk-i âmma müntehî bir matbahımı ve fırını ve taş duvarı müştemil bi-hesâb-ı terbî‘i doksan dört zirâ‘ arsayı müteveffâ-yı mezbûrun zarûret-i deyni içün doksan dört kıt‘a esedî guruşa mezkûr el-Hâc Aliˈye biˈl-vesâye bey‘ ve teslîm ol dahi arsa-i mesfûreyi vech-i meşrûh üzere ahz ve kabz ve tesellüm eyle[me]dikden sonra semeni olan meblağ-ı mezbûru müşteri-i mezkûr el-Hâc Ali yedinden tamamen ahz u kabz eyledim dedikde gıbbeˈt-tasdîk mâ vaka‘a biˈt-taleb ketb olundu. Fiˈl-yevmiˈl-hâmis-i aşer min-şehri Cumâdelâhire li-sene erba‘a ve semânîn ve elf. Şuhûdüˈl-hâl: Veli Reis b. Mehmed, el-Hâc Hasan b. Abdülkerim, el-Hâc Veli b. Ramazan, Ahmed b. Osman