Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 471 Hüküm no: 311 Orijinal metin no: [74b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kâtibe’nin, merhume Ayşe Hatun’un terekesindeki bazı eşyaları sakladığı iddiasının ispat edilemediği Mahrûse-i Galata a‘mâlinden kasaba-i Kasımpaşaˈda Küçük Piyalepaşa mahallesi sâkinelerinden iken vefât eden Ümmügülsüm bt. İbrahim Kapudanın verâseti vâlidesi Âişe nâm hatun ile li-ebeveyn karındaşları Hadîce ve Aliˈye münhasıra olup kableˈl-kısmete mezbûre Hadîce dahi fevt olup verâseti yine vâlidesi mezkûre Âişe ile li-ebeveyn karındaşı mezbûr Aliˈye münhasıra olup verâseti vâlidesi Râziye nâm hatun ile sadrî sagīr oğlu mezbûr Aliˈye münhasıra olduğu şer‘an mütehakkık oldukdan sonra sagīr-i mezbûrun li-eb karındaşı ve cânib-i şer‘den tesviye-i umûruna vasî-i mansûbu olan Mehmed Çelebi vesâyeten ve mezbûre Râziye Hatun tarafından husûmet-i âtiˈl-beyâna vekîli olup nehc-i şer‘î üzre vekâleti sâbite olan Sarrâc Ali Çelebi vekâleten meclis-i şer‘-i şerîfde râfi‘a-i hâzeˈl-kitâb Kâtibe bt. Abdullah mahzarında her biri vesâyeten ve vekâleten üzerine da‘vâ ve takrîr-i kelâm edip mûrisemiz müteveffât-ı mezbûre Âişe Hatunˈun cümle muhallefâtından on yasdık ve sekiz yorgan ve ba‘zı ma‘lûmüˈl-aded evânî-i nühâsiyesini mezbûre Kâtibe bi-gayr-ı vech-i şer‘î ahz ve ketm ü ihtifâ etmekle hâlâ eşyâ-yı mezbûreyi mezkûre Kâtibeˈden taleb eylediğimizde vermeden imtinâ‘ eder suâl olunup ihkāk-ı hak olunmak murâdımızdır dediklerinde gıbbeˈs-suâl ve akībeˈl-inkâr ve isre-talebiˈl-beyyine müdde‘iyyân-ı mezbûrândan her biri ityân-ı beyyineden izhâr-ı acz ve istihlâf etmeğin müteveffiye-i mezbûre Âişe Hatunˈun cümle muhallefâtından on yasdık ve sekiz yorgan ve ma‘lûmüˈl-aded evânî-i nühâsiyesini mezkûre Kâtibe vech-i meşrûh üzere ahz ü ihfâ etmediğine half-i biˈllâhiˈl-aliyyüˈl-a‘lâ etmeğin mûcebiyle mezbûre Kâtibeˈden bî-vech mu‘ârazadan müdde‘iyyân-ı mezbûrân vasî ve vekîl men‘ olunup mâ vaka‘a biˈt-taleb ketb olundu. Fî-evâsıt-ı şehr-i Şa‘baniˈl-mu‘âzzam li-sene erba‘a ve semânîn ve elf. Şuhûdüˈl-hâl: es-Sâbıkūn