Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 756 Hüküm no: 981 Orijinal metin no: [116b-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Bey b. Abdullah’ın tasarrufu kendisine ferağ edildiğini iddia ettiği tarla hususundaki davasında iddiasını ispatlayamadığı Mahmiye-i İstanbul’da Ayasofya-i Kebîr kurbunda Akbıyık mahallesi sükkânından Mehmed Bey b. Abdullah nâm kimesne meclis-i şer‘-i şerîf-i lâzımü’t-teşrîfde vilâyet-i Anadolu’da Taşköprü kazâsına tâbi‘ Hamidköyü nâm karye ahâlîsinden zikri âtî tarlaya vâzı‘ü’l-yed olan bâ‘isü’l-kitâb Şaban Bey b. Mehmed nâm kimesne ile sâhib-i arz vekîli mahzarlarında mezbûr Şaban Bey üzerine da‘vâ ve takrîr-i kelâm edip karye-i mezbûrede vâki‘ hudûdu beynimizde ma‘lûm Kadı Ağlağı demekle ma‘rûf keyl-i İstanbulî ile on keyl tohum isti‘âb eder bir kıt‘a tarlayı mutasarrıf olan Arnavud Mustafa Bey târih-i kitâbdan yirmi altı sene mukaddem ma‘rifet-i sâhib-i arz ile bedel-i ma‘lûm mukābelesinde Ahmed Ağa nâm kimesneye ferâğ edip mezbûr Ahmed Ağa dahi ba‘de’t-tefevvuz mutasarrıf iken fevt olup intikāl-i âdî ile oğluna intikāl ettikde oğlu dahi kezâlik bana ferâğ ve tefvîz ben dahi tefevvuz etmekle hakk-ı müfevvazım iken mezbûr Arnavud Mustafa’nın zikr olunan tarlayı merkūm Ahmed Ağa’ya vech-i muharrer üzre ferâğından sonra mezbûr Şaban Bey’e ferâğ ve tefvîz etmekle mezbûr Şaban Bey zikr olunan tarlaya bi gayrı hakkın vaz‘-ı yed eder suâl olunup kasr-ı yedine ve bana teslîme tenbîh olunmak matlûbumdur dedikde gıbbe’s-suâl mezbûr Şaban Bey cevâbında zikr olunan tarlayı târih-i kitâbdan yirmi beş sene mukaddem mutasarrıfı mezbûr Arnavud Mustafa Bey izn-i sâhib-i arz ile bana ferâğ ve tefvîz edip ben dahi tefevvuz etmekle vaz‘-ı yed ederim benden mukaddem mezbûr Ahmed Ağa’ya ferâğ ma‘lûmum değildir deyicek müdde‘î-i mezbûrdan müdde‘âsını mübeyyine beyyine taleb olundukda ityân-ı beyyineden izhâr-ı acz ile istihlâf etmeğin mezbûr Şaban Bey’e zikr olunan tarlayı kendiden mukaddem mutasarrıfı mezbûr Arnavud Mustafa Bey ve merkūm Ahmed Ağa’ya ferâğ ve tefvîz edip ol dahi tefevvuz ettiğini bilmediğine yemîn teklîf olundukda ol dahi alâ vefki’l-mes’ûl yemîn billâhi’l-aliyyi’l-a‘lâ etmeğin mûcebince müdde‘î-i mezbûr mu‘ârazadan men‘ olunmağın mâ vaka‘a bi’t-taleb ketb olundu. Fî selhi şehri Ramazâni’l-mübârek li sene seb‘a ve seb‘în ve elf. Şuhûdü’l-hâl: Mehmed Ağa b. Mustafa, Ramazan Bey b. ( ), Satılmış Bey b. Abdi, Maden Bey b. Hasan Bey, Mehmed Beşe b. Ramazan.