Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 483 Hüküm no: 319 Orijinal metin no: [77a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhume Fatma bt. Abdullah’tan beytülmala intikal eden ev hisselerinin kocası Mustafa Bey’e satıldığı Mahmiye-i Galataˈya tâbi‘ kasaba-i Kasımpaşaˈda el-Hâc Hüsrev mahallesinde sâkine iken bundan akdem müteveffât olan Fatma bt. Abdullah nâm hatunun zevc-i metrûku Mustafa Bey b. Hüsam nâm kimesneden gayrı zâhirde vâris-i ma‘rûfu olmamağla muhallefâtının nısfı mezbûr Mustafaˈya ve nısf-ı âharı cânib-i beytü’l-mâle â’id olduğu şer‘an zâhir ve mütehakkık oldukdan sonra işbu bâ‘isüˈl-kitâb mezbûr Mustafa meclis-i hatîr-i lâzımüˈt-tevkīrde muhallefât-ı müteveffât-ı mezbûreden olmak zu‘mıyla menzil-i âtiˈz-zikre vâzi‘uˈl-yed olan biˈl-fi‘il mahmiye-i mezbûrede ve tevâbi‘inde emîn-i beytü’l-mâl olan Mehmed Ağa mahzarında üzerine da‘vâ ve takrîr-i kelâm edip müteveffât-ı mezbûre hâl-i hayatında ve kemâl-i akl u sıhhatinde emlâkinden mahalle-i mezbûrede vâki‘ bir tarafından Ahmed Çelebi mülkü ve bir tarafından ba‘zan Gevher Hatun mülkü ve ba‘zan Halil mülkleri ve bir tarafından Fatma Hatun mülkü ve bir tarafındantarîk-i âm ile mahdûd bir bâb fevkānî oda ve dehliz ve zokak kapısını müştemil mülk menzilini bana hîbe-i sahîha ile hîbe ve teslîm eylediğinden mâ‘adâ zimmetimde mütekarrir bin akçe mehr-i müeccelinden dahi yedi yüz akçesini kezâlik bana hîbe-i sahîha ile eylediğinden ben dahi meclis-i hîbede ittihâb ve kabz kabûl edip mülk-i mevhûbum olmuş iken mezbûr Mehmed Ağa bi-gayr-ı hakk-ı şer‘î vaz‘-ı yed eder suâl olunsun dedikde gıbbeˈs-suâl veˈl-inkâr merkūm Mustafaˈdan takrîrine muvâfık beyyine taleb olundukda udûlden es-Seyyid Mehmed Efendi b. Derviş ve Hüseyin Çelebi b. Mehmed el-müezzin ve Mehmed b. Mahmud nâm kimesneler li-ecliˈş-şehâde hâzırûn biˈl-meclis olup isreˈl-istişhâd fiˈl-vâki‘ müteveffât-ı mezbûre sıhhati hâlinde mülkünde olan menzil-i mahdûd-ı mezkûru ve mehr-i merkūmdan yedi yüz akçeyi bizim huzûrumuzda zevci müdde‘î-i merkūma hîbe ve teslîm edip ol dahi meclis-i hîbede ittihâb-ı şer‘î eylediklerinde ba‘de ri‘âyet-i şerâ’yitiˈl-kabûl şehâdetleri makbûle olmağın mûcebiyle emîn-i mezbûrun menzil-i merkūmundan kasr-ı yedine tenbîh olunup mâ vaka‘a biˈt-taleb ketb olundu. Fiˈl-yevmiˈl-âşir min-Ramazaniˈl-mübârek li-sene erba‘a ve semânîn ve elf. Şuhûdüˈl-hâl: Muslı Bey b. Ramazan, Ahmed Çelebi b. Mustafa, Ramazan b. Abdullah, Mehmed b. Murteza, Osman b. Receb, Seyfullah Çavuş b. Müstecâb