Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 483 Hüküm no: 320 Orijinal metin no: [77a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhum Saraç Mustafa’nın, karısı İsmihan’a olan mehir borcunun vasîden tahsil edildiği Mahrûse-i Galata hâricinde kasaba-i Tophâneˈde el-Hâc Ömer mahallesinde sâkin iken bundan akdem müteveffâ olan Sarrâc Mustafaˈnın zevce-i metrûkesi işbu bâ‘isüˈl-kitâb İsmihan bt. Abdullah nâm hatun meclis-i şer‘-i hatîr-i lâzımüˈt-tevkīrde müteveffâ-yı mezbûrun evlâd-ı sıgārının tesviye-i umûrları’çün kıbel-i şer‘den mansûb vasîleri olmağla muhallefât-ı müteveffâ-yı mezbûra vâzi‘uˈl-yed olan Abdülkadir Çelebi mahzarında üzerine da‘vâ ve takrîr-i kelâm edip zevcim müteveffâ-yı mezbûrun zimmetinde mütekarrir ve ma‘kūdun-aleyh altı bin akçe râyic fiˈl-vakt mehr-i müeccel hakkımı sıhhatinde kendi kendinden da‘vâ ettiğimde alâ-ruûsiˈl-istişhâd ikrâr eyleyip lâkin kableˈl-ahz vefât eyleyip zimmetinde kalmağla hâlâ terekesinden vermek üzre vasî-i mezbûrdan taleb ederim suâl olunsun dedikde gıbbeˈs-suâl veˈl-inkâr müdde‘iyye-i mezbûreden da‘vâsına mutâbık beyyine taleb olundukda mahalle-i mezbûre ahâlîsinden olup udûl-ı Müslimînˈden olan el-Hâc Hüseyin Efendi b. el-Hâc Mustafa ve Mehmed Bey b. Sefer nâm kimesneler li-ecliˈş-şehâde hâzırân biˈl-meclis olup isreˈl-istişhâd fiˈl-vâki‘ müteveffâ-yı mezbûr sıhhati hâlinde bizim huzûrumuzda zevcim merkūme İsmihan zimmetimde mütekarrir ve ma‘kūdun-aleyh olan altı bin akçe mehr-i müeccelimi hâlâ zimmetimde deynimdir deyip ikrâr eyleyip bizi işhâd eyledi biz bu husûsa şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde ba‘de ri‘âyet-i şerâ’yitiˈl-kabûl şehâdetleri makbûle olmağın gıbbeˈt-tahlîfiˈş-şer‘î mûcebiyle [77b] vasî-i mezbûre tenbîh olunup mâ vaka‘a biˈt-taleb ketb olundu. Fiˈl-yevmiˈl-âşir min-şehri Ramazaniˈl-mübârek li-sene erba‘a ve semânîn ve elf. Şuhûdüˈl-hâl: Ali Beşe b. Mehmed, Mehmed b. Hasan, Hamza Beşe b. Receb, Hasan b. Ali, Ahmed b. Mehmed, Yusuf Beşe b. Ali Sümme mâtetiˈl-merhûme Sâliha el-mezbûre ve tereket ümmen med‘uvveten Âişe bt. Abdullah ve uhten sagīreten li-ebeveyn Fatma el-mezbûre ve ahen li-eb Mehmed el-mezbûr ve hamlen zâhiren fî-batni ümmühû veˈl-verâsetü münhasıratün fîhim. Vaka‘aˈt-tahrîr fiˈl-yevmiˈs-sâlis min-şehri Ramazaniˈl-mübârek li-sene erba‘a ve semânîn ve elf. El-müntakil mineˈl-ebiˈl-müteveffeˈl-mezbûr 5168 Minhâ Techîz ve tekfîn 720 Nafaka-i mefrûza 360 Yevm 3, şehr 4 Resm-i âdî 75 Kassâmiye 25 Kalemiye, ihzâriye 25 Harc-ı müteferrika 80 Vasî harcı 15 Yekûn 1300 Sahhuˈl-bâkī 3868 Hissetüˈl-üm Mineˈn-nükūd 220 Bedel-i kitâbet 425 Hissetüˈl-uht Mineˈn-nükūd 0654 Bedel-i kitâbet 1275 Hissetüˈl-âh Mineˈn-nükūd 218 Bedel-i kitâbet 425