Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 757 Hüküm no: 982 Orijinal metin no: [117a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Musa Efendi’nin, atıyla giderken Ali b. İbrahim’in üzerine düşüp ayağını kırmasıyla ilgili davada sulh yoluyla anlaşıldığı Mahmiye-i İstanbul’da Tercümân Yunus mahallesinde sâkin Ali b. İbrahim nâm kimesnenin karındaşı ve tarafından husûs-ı âti’l-beyâna vekîl olup Yusuf b. Halil ve Abbas b. Ali nâm kimesneler şehâdetleriyle vekâleti sâbite olan Yusuf nâm kimesne meclis-i şer‘de bâ‘isü’l-kitâb Musa Efendi b. ( ) tarafından husûs-ı âti’l-beyâna vekîl olduğu Osman Çelebi b. Mehmed ve Mustafa b. Mehmed nâm kimesneler şehâdetleriyle şer‘an vekâleti sâbit olan es-Seyyid Halil Çelebi b. es-Seyyid Mehmed nâm kimesne mahzarında bi’l-vekâle ikrâr ve takrîr-i kelâm edip müvekkil-i mezbûr Musa Efendi târih-i kitâb günü ba‘de’z-zuhr merhûm Sultan Mehmed Hân câmi‘-i şerîfi hareminde bârgir üzerinde gider iken bârgiri ürküp zabt edememekle müvekkilim mezbûr Ali’nin üzerine uğrayıp mezbûrun sağ ayağını basıp andan nâşî mezbûrun ayağı kırılmağla bundan akdem müvekkil-i mezbûrdan mûceb-i şer‘îsini da‘vâ ettiğimde, ol dahi inkâr etmekle beynimizde münâza‘ât-ı kesîre vakı‘a olmuşidi el-hâletü hâzihî beynimize muslihûn tavassut edip husûs-ı mezbûr da‘vâsından vekîl-i mezbûr es-Seyyid Halil Çelebi[’yi] benimle yirmi esedî guruş üzerine sulh ettiklerinde ben dahi sulh-i mezbûru kabûl ve bedel-i sulh olan meblağ-ı mezbûr yirmi esedî guruşu vekîl-i mezbûr es-Seyyid Halil Çelebi yedinden tamâmen ahz u kabz edip mûceb-i cerh-i mezbûrdan ve cerh-i mezbûrun te’sîrinden nâşî hâdis olacak şeyden ibrâ-i âmm-ı kātı‘ü’n-nizâ‘ ile ibrâ ve iskāt eyledi dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fî selhi şehri Ramazâni’l-mübârek li sene seb‘a ve seb‘în ve elf. Şuhûdü’l-hâl: Osman Çelebi b. Ahmed, Yusuf Çelebi b. Receb, Mustafa Çelebi b. Sefer, el-Hâc Mustafa b. Mehmed, Mustafa Çavuş b. Ali el-Mübâşir, Mehmed Çelebi b. Abdullah.