Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 758 Hüküm no: 983 Orijinal metin no: [117a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Nikola v. İstati’nin, ortağı Yani v. Todori’deki alacağını vârislerin tahsil ettiği Vilâyet-i Rumeli’nde Mora sancağında Kalavrita kazâsına tâbi‘ Salane nâm karye ahâlîsinden olup bundan akdem mahmiye-i İstanbul’da Kumkapı hâricinde Reis meyhânesi’nde meyhâneci iken hâlik olan Nikola v. İstati nâm zimmînin verâseti zevce-i metrûkesi Gabtana bt. Kostantin ve li ebeveyn er karındaşı Yani nâm zimmîye münhasıra olduğu şer‘an mütehakkik oldukdan sonra mezbûr Yani asâleten ve mezbûre Gabtana’nın anası ve tarafından husûs-ı âti’l-beyâna vekîli olduğu Papa v. Papa Kostantin ve Dimitri v. Nikola nâm zimmîler şehâdetleriyle şer‘an sâbit olan Harone bt. Yorgaki nâm nasrâniye vekâleten meclis-i şer‘-i şerîfde hâlik-i mezbûrun hayâtında meyhânecilikde şerîki olan bâ‘isü’l-kitâb Yanaki v. Todori nâm zimmî mahzarında her biri ikrâr ve takrîr-i kelâm edip mezbûr Nikola hayâtında asl-ı mâl ve fâideden şerîki mezbûr Yanaki yedinden hakkı olan kırk sekiz bin akçenin on dokuz bin altı yüz akçesini ahz u kabz edip ba‘dehû hâlik oldukda bâkī yirmi sekiz bin dört yüz akçesini dahi mezbûr Yanaki yedinden ahz u kabz edip husûs-ı mezbûra müte‘allika âmme-i de‘âvâdan mezbûr Yanaki’nin zimmetini ibrâ-i âm ile ibrâ ve iskāt eyledik dediklerinde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’t-tâsi‘ ve’l-ışrîn min şehri Ramazâni’l-mübârek li sene seb‘a ve seb‘în ve elf. Şuhûdü’l-hâl: Mehmed Çelebi b. Abdullah Kethüdâ-yı muhzırân, Abdi Çelebi b. ( ) Kāimmakām-ı serbölük, Hasan Çelebi b. Ahmed, İbrahim Çelebi b. Ahmed, Dimitri v. Nikola.