Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 758 Hüküm no: 984 Orijinal metin no: [117a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Süleyman Çelebi b. Derviş’in kefaleti sebebiyle haksız yere kendisini hapsettiren Mustafa Ağa’yı hapse attırdığı İşbu bâ‘isü’l-kitâb Süleyman Çelebi b. Derviş nâm kimesne meclis-i şer‘-i şerîf-i lâzımü’t-teşrîfde Mehmed Çavuş b. İbrahim nâm kimesne mahzarında üzerine da‘vâ ve takrîr-i kelâm edip mezbûr Mehmed Çavuş’un emri ile karz-ı şer‘îden ve bir at bahâsından Celeb Mustafa Ağa’ya deyni olan beş yüz esedî guruşa ben kefîl olup ba‘dehû mezbûr Mehmed Çavuş deyn-i mezbûrun otuz esedî guruşunu dâyini mezbûr Mustafa Ağa’ya edâ ve îfâ ettiğinden sonra mezbûr Mustafa Ağa deyn-i bâkī-i mezbûru kefâletime binâen benden taleb ve da‘vâ ve beni haps ettirmekle suâl olunup mezbûr Mehmed Çavuş dahi emrine binâen haps olunmak matlûbumdur dedikde, gıbbe’s-suâl mezbûr Mehmed Çavuş merkūm Mustafa Ağa’ya ciheteyn-i mezbûreteynden deyni olan beş yüz esedî guruşa emri ile kefîl olup ba‘dehû otuz guruşunu edâ ettiğinden sonra mezbûr Mustafa Ağa deyn-i mezbûrdan bâkī için merkūm Süleyman Çelebi’yi haps ettirdiğini ikrâr etmeğin mûcebince mezbûr Mehmed Çavuş dahi haps olunmak üzre mâ vaka‘a bi’t-taleb ketb olundu. Fi’l-yevmi’l-hâmis min Şevvâli’l-mükerrem li sene seb‘a ve seb‘în ve elf. Şuhûdü’l-hâl: Hasan Çavuş el-Mübâşir, eş-Şeyh Mehmed Efendi, Yusuf b. Abdullah, Halil b. İbrahim, Ramazan b. Ali.