Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 530 Hüküm no: 350 Orijinal metin no: [84b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhume Ayşe bt. Mahmud’un kız kardeşi Havva’nın, Ayşe’nin kocasına açtığı tereke ve alacak davasında sulh yoluyla anlaştığı Mahmiye-i Galataˈya tâbi‘ kasaba-i Kasımpaşaˈda el-Hâc Hüsrev mahallesinde sâkine iken bundan akdem müteveffât olan Âişe bt. Mahmud nâm hatunun verâseti zevci Mahmud Beşe b. Hüseyin ile li-eb kız karındaşı Havva nâm hatuna münhasıra olduğu şer‘an zâhir ve mütebeyyin oldukdan sonra mezbûre Havva Hatun tarafından sulh ve ibrâya âtiˈz-zikri ikrâra vekîl olup mezbûreyi ma‘rifet-i şer‘iye ile ârifân olan es-Seyyid Yahya Efendi b. es-Seyyid Derviş el-imâm ve Hüseyin Çelebi b. Mehmed el-müezzin şehâdetleri ile şer‘an vekâleti sâbite olan el-Hâc Mustafa b. Hüseyin nâm kimesne mahfil-i kazâda müteveffât-ı mezbûrenin muhallefâtına vâzi‘uˈl-yed olan zevci işbu bâ‘isüˈl-kitâb mezbûr Mahmud Beşe mahzarında biˈl-vekâle ikrâr ve takrîr-i kelâm edip müvekkilem mezbûre Havva Hatun müteveffât-ı mezbûrenin muhallefâtından mahalle-i mezbûrede vâki‘ menzilden ve mehr-i müeccelinden vesâyir muhallefâtından yetmiş guruş mal-ı zimmetine deyni edâ olundukdan sonra sahhaˈl-bâkīden selâse-i erba‘ hissemi tehârüc-i şer‘î tarîkıyla muslihûn tavassut edip beynimizde on beş kıt‘a esedî guruş üzerine beni mezbûr Mahmud Beşe ile sulh eylediklerinde ben dahi sulh-ı mezbûru kabûl ve bedel-i sulh olan meblağ-ı mezbûru yedinden alıp kabz edip muhallefât-ı mezkûreye müte‘allik âmme-i de‘âvîden mezbûr Mahmud Beşeˈnin zimmetini ibrâ-i âmm-ı kātı‘uˈn-nizâ‘ ile ibrâ ve ıskāt eyledim ba‘deˈl-yevm da‘vâ ve nizâ‘ım yokdur dedi dedikde gıbbeˈt-tasdîkiˈş-şer‘î mâ hüveˈl-vâki‘ biˈt-taleb ketb olundu. Hurrire fiˈl-yevmiˈt-tâsi‘ min-şehri Şevvaliˈl-mükerrem li-sene erba‘a ve semânîn ve elf. Şuhûdüˈl-hâl: Mustafa Efendi b. Hüseyin el-kādî, Muslı Ağa b. Ramazan el-bevvâb-ı sultânî, Mehmed Çelebi b. İsmail, Mustafa Çelebi b. Hüsameddin, el-Hâc Mahmud, Aynî Beşe el-muhzır, Ahmed Beşe