Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 530 Hüküm no: 351 Orijinal metin no: [84b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dilaver’in, merhum Hasan Bey’den alacağını varislerden talep ettiği Mahmiye-i İstanbulˈda vâki‘ Pîrî Paşa odaları demekle ma‘rûf odalarda sâkin râfi‘-i hâzeˈl-kitâb el-Hâc Dilaver b. Abdullah meclis-i şer‘-i hatîr-i lâzımüˈt-tevkīrde mahrûse-i Galata muzâfâtından kasaba-i Tophâneˈde Firuzağa mahallesi sükkânından iken bundan akdem vefât eden Hasan Bey b. Abdurrahman nâm kimesnenin zevce-i metrûkesi ve kıbel-i şer‘den mansûbe vasîsi olmağla terekesine verâseten ve vesâyeten vâzi‘uˈl-yed olan Ümmühani bt. İbrahim nâm hatun tarafından husûs-ı câ’iˈz-zikrde husûmet-i red ve cevâba vekîlolup nehc-i şer‘î üzere vekâleti sâbite olan el-Hâc Mustafa b. Ali mahzarında üzerine da‘vâ ve takrîr-i kelâm edip müteveffâ-yı mezbûr zimmetinde cihet-i deyn-i şer‘îden dört yüz altmış iki kıt‘a esedî guruş hakkım olup kableˈl-edâ vefât etmekle hâlâ tereke-i müteveffâ-yı mezbûrdan da‘vâsına mutâbık beyyine taleb olundukda udûl-ı Müslimînˈden olup bâlâda zikr-i mürûr sebk eden odalar sükkânından el-Hâc Arslan b. Ömer ve Mehmed b. Taceddin nâm kimesneler meclis-i şer‘a hâzırân olup isreˈl-istişhâdiˈş-şer‘î fiˈl-vâki‘ müdde‘î-i mezbûr el-Hâc Dilaverˈin müteveffâ-yı mezkûre Hasan b. Abdurrahman zimmetinde cihet-i deyn-i şer‘îden dört yüz altmış iki kıt‘a esedî hakkı vardır deyü bu husûsa şahidleriz şehâdet dahi ederiz deyü her biri edâ-i şehâdet-i şer‘iye eylediklerinde ba‘de ri‘âyet-i şerâyitiˈl-kabûl şehâdetleri makbûle oldukdan sonra müdde‘î-i mezbûr meblağ-ı mezbûr müteveffâ-yı mezbûrun hayatında asâleten ve vekâleten küllen ve ba‘zan turûk-ı şer‘iyeden bir tarîk ile ahz u istifâ veyâhûd zimmetini ibrâ eylemediğine halfü billâhiˈl-aliyyüˈl-a‘lâ etmeğin mûcebiyle ba‘deˈl-hükm meblağ-ı mezbûrun tereke-i müteveffâ-yı mezbûrdan edâsına vekîl-i mezbûr el-Hâc Mustafaˈya tenbîh birle mâ vaka‘a biˈt-taleb ketb olundu. Fiˈl-yevmiˈl-hâmis-i aşer min-şehri Şevval li-sene erba‘a ve semânîn ve elf. Şuhûdüˈl-hâl: Mehmed Çelebi b. Ali, Şehabeddin b. Kasım, Mehmed b. Mustafa, Hüseyin Çelebi, Ahmed b. Abdullah