Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 545 Hüküm no: 360 Orijinal metin no: [87a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Neslihan Hatun’un ev hissesini ölmeden önce vakf ettiği ancak hastalık halinde vakfın câiz olmadığı için ev hissesinin varislere pay edilmesi Mahmiye-i Galataˈya tâbi‘ kasaba-i Kasımpaşaˈda Kalafatçıbaşı mahallesinde sâkine iken bundan akdem müteveffât olan Neslihan Hatun bt. Seferˈin verâseti zevc-i metrûku Mehmed Reis ile li-ebeveyn karındaşı Receb Reisˈe münhasıra olduğu şer‘an zâhir ve mütebeyyin oldukdan sonra mezbûrân Mehmed ve Receb meclis-i şer‘-i hatîr-i lâzımüˈt-tevkīrde menzil-i âtiˈz-zikre vech-i câˈî üzere vâzi‘atüˈl-yed olan Âişe bt. Hasan nâm hatun mahzarında her biri üzerine da‘vâ ve takrîr-i kelâm edip müteveffât-ı mezbûrenin emlâkinden mahalle-i mezbûrede vâki‘ bir tarafı makābir-i Müslimîn ve iki tarafı Osman Reis mülkü ve bir tarafı tarîk-i hâs ile mahdûd bir bâb tahtânî ve bir bâb fevkānî odaları ve kilârı ve merkūm Osman Reis ile müşterek bi’r-i mâ’i müştemil mülk menzilin cümlesine mezbûre Âişe Hatun bi-gayr-ı vech-i şer‘î vaz‘-ı yed eder suâl olunsun dedikde gıbbeˈs-suâl ve akībeˈl-inkâr merkūme Âişe Hatun cevâbında müteveffât-ı mezbûre menzil-i mezbûru vakf eyleyip sükenâsını bana şart ve ta‘yîn eyledi deyücek gıbbeˈs-suâl müdde‘iyyân-ı mezbûrân Mehmed ve Receb cevâblarında müteveffât-ı merkūme menzil-i mezbûru marazı hâlinde muzâfen ilâ-mâ-ba‘deˈl-mevt vasiyet tarîkı ile vakf eyleyip [87b] ve sülüs mâlı müsâ‘id değildir dediklerinde gıbbeˈs-suâl merkūme Âişe cevâbında hâl-i minvâl-i meşrûh üzere olup müteveffât-ı mezbûre menzil-i mezbûru maraz hâlinde muzâfen ilâ-mâ-ba‘d alıp vasiyet tarîkı ile vakf eyleyip süknâsını dahi ber-vech-i muharrer şart edip ve sülüs mâlı dahi müsâ‘id olmadığını i‘tirâf eylediğinden gayrı fiˈl-hakīka müteveffât-ı mezbûre menzil-i mezbûru vakf-ı sahîh ile sıhhatinde vakf eylediğini isbâta kādir olmamağın mu‘teberâtdan kütüb-ı fetâvâdan Kādıhânˈda vakf-ı marazanın evâhirinde musarrah olduğundan mâ‘adâ Hidâyeˈde kitâb-ı vakfın evâhirinde maraz-ı mevtde vakf-ı sülüsden olduğu alâ-kavliˈl-imâmeyniˈl-hümâmeyn münderic olmağın minvâl-i meşrûh üzere menzil-i mezbûrun vakfiyeti sülüsden mu‘teber olmağın sülüsânından mezbûre Âişe kasr-ı yed etmek üzere tenbîh birle mâ vaka‘a biˈt-taleb ketb olundu. Hurrire fiˈl-yevmiˈl-hâmis-i aşer min-Şevvaliˈl-mükerrem li-sene erba‘a ve semânîn ve elf. Şuhûdüˈl-hâl: Mustafa Efendi b. Hamza, Mustafa Efendi b. Mehmed el-imâm, es-Seyyid Mehmed b. es-Seyyid Ahmed, es-Seyyid Abdi b. es-Seyyid Mehmed, el-Hâc Ahmed b. Ali, Osman Beşe b. İbrahim, Mehmed b. Ali el-hayyât, Mustafa Halîfe b. Hüseyin el-imâm, Musa Hoca b. Ali, Hüseyin b. Mehmed Tekye-nişîn-i makābir