Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 546 Hüküm no: 361 Orijinal metin no: [87b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. Hüseyin Beşe’den intikal eden terekenin vasî tarafından terekeye el koyan Abdurrahman Ağa’dan teslim alındığı Mahmiye-i İstanbulˈda Üskübî Bey mahallesinde sâkin iken bundan akdem vefât eden Mehmed b. Hüseyin Beşeˈnin verâseti anası Âişe bt. Mehmed ile cedd-i sahîh Eyüb Çelebi b. Halilˈe münhasıra olup kıbel-i mezbûr Mehmedˈin li-ebeveyn kız karındaşı Fatma dahi vefât edip verâseti kezâlik anası mezbûre Âişe ile cedd-i sahîh-i merkūm Eyübˈe münhasıra olup ba‘dehû merkūm Mehmedˈin li-ebeveyn âhar kız karındaşı Havva dahi fevt olup verâseti vâlidesi merkūme Âişe ile cedd-i sahîh-i mezkûr Eyübˈe münhasıra olup kableˈl-kısme merkūm dahi vefât edip verâseti zevce-i metrûkesi Fatma bt. Mehmed ile sulbî kebîr oğulları el-Hâc Mustafa ve Himmet ve Veli ile sulbiye-i kebîre kızları Döndü ve Râziye ve Havva ve Gülkadın ve Kızlarbeyi nâm hatunlara münhasıra olduğu şer‘an zâhir ve müte‘ayyin oldukdan sonra kendi tarafından asîl ve er karındaşı Veli ve kız karındaşları mezkûrât taraflarından ikrâr-ı câ’iˈz-zikre vekîl olup merkūmun zâtlarını ma‘rifet-i şer‘iye ile ârifân olan dâmadı Siyavuş Bey b. Abdullah ve mezbûr Himmet şehâdetleri ile şer‘an vekâleti sâbite olan mezbûr el-Hâc Mustafa meclis-i şer‘de mezkûrûn Mehmed ve Fatma ve Havvaˈnın vasî-i muhtârları olup babalarından müntakil mallarına biˈl-vesâye vâzi‘uˈl-yed olan işbu bâ‘isüˈl-vesîka el-Hâc Abdurrahman Ağa b. Abdullah mahzarında asâleten ve vekâleten ikrâr ve takrîr-i kelâm edip merkūmûn Mehmed ve Fatma ve Havvaˈnın babalarından intikāl eden ber-mûceb-i kassâm-ı askerî kırk yedi bin yüz seksen dokuz akçe ile kırk yedi ayda makbûzu olan üç bin yüz akçe murâbaha-i şer‘iye ki min-haysüˈl-mecmû‘ elli bin sekiz yüz seksen dokuz akçeden kırk yedi ayda günde on beşer akçe nafaka-i mefrûzaları ve techîz ve tekfînleri ve ba‘zı mesârif-i lâzıme içün cem‘an yirmi dokuz bin iki yüz altmış akçesi ihrâç olundukdan sonra bâkī kalan yirmi bir bin beş yüz yirmi dokuz akçeden mûrisimiz müteveffâ-yı merkūmun hissesine isâbet eden on dört bin üç yüz elli iki akçeyi asâleten ve vekâletim hasebiyle merkūm el-Hâc Abdurrahman [88a] Ağa yedinden biˈt-tamam veˈl-kemâl alıp kabz eyledim min-ba‘d husûs-ı mezbûra müte‘allika merkūm el-Hâc Abdurrahman Ağa ile da‘vâ ve nizâ‘ım ve hak ve alâkamız kalmadı dedikde gıbbeˈt-tasdîk mâ vaka‘a biˈt-taleb ketb olundu. Fiˈl-işrîn min-Şevvaliˈl-mükerrem li-sene erba‘a ve semânîn ve elf. Şuhûdüˈl-hâl: Mehmed Efendi b. Süleyman, Mustafa Çelebi b. Süleyman, Ahmed Çelebi Hayyât, Ali Beşe b. Mehmed, Mustafa Beşe b. Mehmed, Mehmed Çelebi b. Ahmed, Mustafa Beşe Kurd, Hasan b. İbrahim