Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 547 Hüküm no: 362 Orijinal metin no: [88a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmail Ağa’nın, merhum Kaymak Mehmed’deki alacağını varislerden talep ettiği İşbu sahibüˈl-kitâb ve zahrüˈl-emâcid veˈl-ekârim İsmail Ağa b. el-Hâc Hasan meclis-i şer‘-i hatîrde mahmiye-i Galata hâricinde Şahkulu mahallesinde sâkin iken bundan akdem vefât eden Kaymak Mehmed b. Rıdvanˈın verâseti zevce-i metrûkesi Âişe bt. Mehmed ile vâlidesi Hadîce bt. Hasanˈa münhasıra olduğu şer‘an zâhir ve müte‘ayyin oldukdan sonra mezbûre Hadîce mahzarında üzerine da‘vâ ikrâr ve takrîr-i kelâm edip müteveffâ-yı mezbûr hayatında bir def‘a iki bin esedî ve bir def‘a yedi yüz esedî ki cem‘an iki bin yedi yüz esedî guruş ikrâz ve teslîm ol dahi ba‘deˈl-istikrâz veˈt-tesellüm meblağayn-i mezbûreyni kableˈl-istifâ fevt olup hâl-i hayatında huzûr-ı Müslimînˈde vâzi‘uˈl-yed olduğu tereke müteveffâ-yı mezbûrdan taleb ederim suâl olunsun dedikde gıbbeˈs-suâl veˈl-inkâr müdde‘î-i mezbûrdan müdde‘âsına beyyine taleb olundukda udûl-ı Müslimînˈden el-Hâc Hasan Efendi b. Abdülkadir ve Küçük Mehmed Beşe b. Mustafa nâm kimesneler li-ecliˈş-şehâde meclis-i şer‘a hâzırân olup gıbbeˈl-istişhâd fiˈl-hakīka müteveffâ-yı mezbûr hayatında müdde‘î müşârün-ileyh yedinden bir def‘a iki bin esedî ve bir def‘a yedi yüz esedî ikrâr ve bizi işhâd eyledi biz bu husûsa şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde ba‘deˈt-ta‘dîl veˈt-tezkiye şehâdetleri makbûle oldukdan sonra müdde‘î-i mûmâ-ileyh aleˈl-vechiˈl-meşrû‘ tahlîfden sonra mûcebiyle ba‘deˈl-hükm mâ-vaka‘a biˈt-taleb ketb olundu. Fiˈl-âşir min-Şa‘bâniˈl-mu‘azzam li-sene erba‘a ve semânîn ve elf. Şuhûdüˈl-hâl: Mustafa Ağa b. Osman Çelebi, el-Hâc Mehmed b. Ali, el-Hâc Hasan b. Şa‘bân Çelebi, es-Seyyid Mehmed Çelebi b. es-Seyyid Abdurrahman, Mehmed Kapudan Ağa b. Muslı, Halil b. Mehmed, Mehmed Beşe b. Ahmed, es-Seyyid Hasan, Hasan Çelebi b. Abdullah