Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 554 Hüküm no: 367 Orijinal metin no: [89b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan b. Abdullah’ın, merhum Rodosî Mehmed Kapudan’ın azatlı kölesi olduğundan varislerin kölelik iddialarının reddedildiği İşbu orta boylu, açık kaşlı, sarı, elâ gözlü, Rusiyyüˈl-asl bâ‘isüˈl-vesîka Hasan b. Abdullah meclis-i şer‘de mahmiye-i Galata muzâfâtından kasaba-i Kasımpaşaˈda el-Hâc Hasan mahallesinde sâkin iken bundan akdem Kırım Adasıˈnda vefât eden Rodosî Mehmed Kapudan b. Yusufˈun verâseti zevce-i metrûkesi Âişe Hatun bt. Elvan ile li-üm er karındaşı Ivaz Çelebi b. Mehmedˈe münhasıra olduğu şer‘an zâhir ve mütebeyyin oldukdan sonra merkūme Âişe Hatunˈun vekîl-i müsecceli Ahmed Efendi b. Ali ile mezbûr Ivaz Çelebi mahzarlarında üzerlerine da‘vâ ve takrîr-i kelâm edip ben müteveffâ-yı mezbûr abd-i memlûku olup mülkünde olduğum hâlde hasbeten lillâh-i te‘âlâ ve taleben li-merdât-i Rabbihiˈl-a‘lâ beni mülkünden ifrâz edip tahrîr ve i‘tâk ve zümre-i ahrâra ilhâk edip ben hürr olmuş iken hâlen mezbûrân bana rık olmak üzere vaz‘-ı yed murâd eder suâl olunup sebîlim tahliye ve üzerimden yed-i âdiyeleri nez‘ olunmaları matlûbumdur dedikde gıbbeˈs-suâl veˈl-inkâr gulâm-ı mezkûrdan müdde‘âsına beyyine taleb olundukda udûl-ı ricâlden zahrüˈl-a‘yân Mustafa Çelebi b. Elvan ve Mehmed Ağa ve Seydi Ali Çelebi b. Muslı nâm kimesneler li-ecliˈş-şehâde meclis-i şer‘a hâzırûn olup isreˈl-istişhâd fiˈl-vâki‘ müteveffâ-yı mezbûr Mehmed Kapudan merkūm Hasanˈı bizim huzûrumuzda hayatında hasbeten lillâh-i te‘âlâ tahrîr ve i‘tâk ve zümre-i ahrâra ilhâk eyledi biz bu husûsa şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde ba‘de ri‘âyet-i şerâ’itiˈl-kabûl şehâdetleri makbûle oldukdan sonra mûcebiyle gulâm-ı mezbûr Hasanˈın hürriyetine ve mezkûrânın kasr-ı yedlerine ba‘deˈt-tenbîh mâ vaka‘a biˈt-taleb ketb olundu. Fiˈs-sâmin veˈl-işrîn min-Şevvaliˈl-mükerrem li-sene erba‘a ve semânîn ve elf. Şuhûdüˈl-hâl: Süleyman Efendi b. Mehmed el-imâm, Mustafa Çelebi b. Mehmed, Mustafa Efendi b. Mehmed, Ahmed Efendi b. Ali, Süleyman Bey b. Mehmed, Mehmed Çelebi b. Mustafa, Mehmed Halîfe b. Abdullah el-müezzin, İsmail Çelebi b. Mehmed, Ahmed Çelebi b. Mustafa.