Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 556 Hüküm no: 370 Orijinal metin no: [90a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun’un, merhum kocası Rodoslu Mehmed Kapudan’daki mehir alacağını terekeye el koyan İvaz Çelebi’den talep ettiği Mahmiye-i Galata a‘mâlinden kasaba-i Kasımpaşaˈda el-Hâc Hasan mahallesi sükkânından olup bundan akdem Kırım Adasıˈnda vefât eden Rodoslu Mehmed Kapudan b. Yusufˈun verâseti zevce-i metrûkesi fahrüˈl-muhadderât Âişe Hatun bt. Elvan ile li-üm karındaşı İvaz Çelebi b. Mehmedˈe münhasıra olduğu şer‘an zâhir ve müte‘ayyin oldukdan sonra merkūme Âişe Hatun meclis-i şer‘-i hatîr-i lâzımüˈt-tevkīrde tereke-i müteveffâ-yı mezbûre vâzı‘üˈl-yed olan mezbûr Ivaz Çelebi mahzarında üzerine da‘vâ ve takrîr-i kelâm edip zevcim müteveffâ-yı mezbûr Mehmed Kapudanˈın zimmetinde ma‘kūdun-aleyh olan yüz esedî guruş mehr-i müeccelimi kableˈl-ahz vefât etmekle hâlâ terekesinden olmak üzre İvaz Çelebiˈden taleb ederim suâl olunsun dedikde gıbbeˈs-suâl veˈl-inkâr müdde‘iyye-i mezbûreden müdde‘âsına beyyine taleb olundukda udûl-ı Müslimînˈden olup mahalle-i mezbûre imâmı olan Süleyman Efendi b. Mehmed ve müezzini olan Mehmed Halîfe b. Abdullah nâm kimesneler li-ecliˈş-şehâde meclis-i şer‘a hâzırân olup gıbbeˈl-istişhâd fiˈl-hakīka müdde‘iyye-i mezbûre yüz guruş mehr-i müeccel tensibiyle nefsini müteveffâ-yı merkūm Mehmed Kapudanˈa tezvîc ol dahi huzûrumuzda tezevvüc ve kabûl eyledi biz bu husûsa şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde isre-ri‘âyet-i şerâ’itiˈl-kabûl şehâdetleri makbûle oldukdan sonra müdde‘iyye-i mezbûre aleˈl-vechiˈl-meşrû‘ tahlîfden sonra mûcebiyle hüküm birle mâ vaka‘a biˈt-taleb ketb olundu. Fiˈl-yevmiˈs-sânî veˈl-işrîn min-Şevvaliˈl-mükerrem li-sene erba‘a ve semânîn ve elf. Şuhûdüˈl-hâl: es-Sâbıkūn