Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 556 Hüküm no: 371 Orijinal metin no: [90a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Çelebi’nin, merhum Rodoslu Mehmed Kapudan’ın zimmetindeki çuka bahasından alacağını varislerden talep ettiği Mahmiye-i Galata hısnı ebvâbından Azebkapısı kurbünde sâkin Cafer Beyzâde demekle ma‘rûf işbu sahibüˈl-kitâb Ahmed Çelebi b. Mustafa meclis-i şer‘-i enverde mahmiye-i mezbûre tevâbi‘inden kasaba-i Kasımpaşaˈda el-Hâc Hasan mahallesinden olup bundan akdem Kırım Adasıˈnda vefât eden Rodoslu Mehmed Kapudan b. Yusufˈun verâseti zevce-i metrûkesi Âişe Hatun bt. Elvan ile li-üm er karındaşı Ivaz Çelebi b. Mehmedˈe münhasıra olduğu şer‘an zâhir [90b] ve müte‘ayyin oldukdan sonra mezbûr Mehmed Kapudanˈın terekesine vâzi‘uˈl-yed olan merkūme Âişe Hatunˈun vekîl-i müsecceli olan Ahmed Efendi ile mezkûr Ivaz Çelebi mahzarlarında üzerlerine da‘vâ ve takrîr-i kelâm edip deryâ beylerinden olup gāib aniˈl-meclis Hasan Bey nâm kimesne zimmetinde benim cihet-i deyn-i şer‘îden bin altı yüz kırk guruş hakkım olup mezbûr Hasan Beyˈin dahi müteveffâ-yı mezbûr yedinde altmış buçuk zirâ‘ Londrine emânet çukası olmağla mezkûr Hasan Bey her zirâ‘ı dörder esedî guruşdan iki yüz altmış iki guruş olmak üzere deyn-i mezkûreynin iki yüz altmış guruşuna mârrüˈz-zikr çukayı üçümüz bir meclisde hazır iken mezbûr bey merkūm Mehmed Kapudanˈdan bana havâle-i sahîha-i şer‘iye ile havâle edip ben dahi ba‘de kabûliˈl-havâle sâlifüˈz-zikr çukayı mezbûr Mehmed Kapudanˈdan taleb eylediğimde ol dahi cevâbında ben zikrolunan çukayı semen-i ma‘lûme bey‘ edip semenini kendi mesârifime sarfla istihlâk etmişidim lâkin meblağ-ı mezbûr iki yüz altmış iki esedî guruş zimmetimde sâkine bi-hükmiˈl-havâle deynimdir deyü huzûr-ı Müslimînˈde ikrâr ve bizi işhâddan sonra kableˈl-edâ fevt olmağla hâlen terekesinden meblağ-ı mezbûr iki yüz altmış iki esedî guruşu vekîl-i mezbûr ile merkūm Ivaz Çelebiˈden taleb ederim suâl olunsun dedikde gıbbeˈs-suâl veˈl-inkâr ba‘de talebiˈl-beyyine udûl-ı Müslimînˈden Elvan Kapudanzâde Mustafa Çelebi ve diğer Mustafa Çelebi b. el-Hâc Mehmed li-ecliˈş-şehâde meclis-i şer‘a hâzırân olup isreˈl-istişhâd fiˈl-vâki‘ müteveffâ-yı mezbûr Mehmed Kapudan bâlâda tafsîli mürûr ettiği vech üzere mezbûr Ahmed Çelebiˈye bi-hükmiˈl-havâle meblağ-ı mezbûr iki yüz altmış iki kıt‘a esedî zimmetimde deynimdir deyü bizim huzûrumuzda ikrâr ve bizi işhâd eyledi biz bu husûsa şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde isre-ri‘âyet-i şerâ’itiˈl-kabûl şehâdetleri makbûle oldukdan sonra müdde‘î-i mezbûr Ahmed Çelebiˈye ba‘deˈt-tahlîfiˈş-şer‘î mûcebiyle hüküm birle mâ vaka‘a biˈt-taleb ketb olundu. Fiˈs-sâmin veˈl-işrîn min-Şevvaliˈl-mükerrem li-sene erba‘a ve semânîn ve elf. Şuhûdüˈl-hâl: es-Sâbıkūn