Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 559 Hüküm no: 376 Orijinal metin no: [91a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatma’nın, kızı merhume Sâliha bt. Hasan’dan kendine intikal eden ev hissesini damadı Mehmed Beşe’ye sattığı Medîne-i Hazret-i Ebâ Eyyûbeˈl-Ensârî kazâsına tâbi‘ Ayas Ağa nâm karyede sâkine iken bundan akdem vefât eden Sâliha bt. Hasan nâm hatunun verâseti zevc-i metrûku Mehmed Beşe b. Halil ile vâlidesi Fatma bt. Halilˈe ve sadrî oğlu İbrahim ve sadriye sagīre kızı Afifeˈye münhasıra ve tashih-i mes’eleleri otuz altı sehimden i‘tibâr olunup sihâm-ı mezbûreden dokuz sehmi zevci mezbûre ve altı sehmi anası merkūmeye ve on dört sehmi sagīr-i mezkûra ve yedi sehmi sagīre-i mersûmeye isâbet ettiği şer‘an zâhir ve müte‘ayyin oldukdan sonra mezbûre Fatma meclis-i şer‘-i hatîrde işbu bâ‘isüˈl-vesîka mezkûr Mehmed Beşe mahzarında ikrâr ve takrîr-i kelâm edip kızım müteveffât-ı mezbûrenin ileˈl-vefât kabzında tasarrufunda mülk-i sahîhi olup karye-i mezbûrede vâki‘ olan bir tarafdan Bulgar Mustafa mülküne ve bir tarafdan Sinan Bey mülküne ve bir tarafdan Korucuzâde Mustafa mülküne ve bir tarafdan tarîk-i âmma müntehî üç bâb fevkānî ve bir bâb tahtânî odaları ve bir fırın ve bir ahurı ve bir mikdâr bağçe ve muttasıl harman yerini ve mezbûr Bulgar Mustafa tarafında olan bir mikdâr arsa-i hâliyeyi müştemil çiftlik ta‘bîr olunur mülk menzilde olan altı sehim hisse-i şer‘iyemi bi-cümletiˈt-tevâbi‘ veˈl-levâhık tarafeynden îcâb ve kabûlü hâvî ve bey‘-ı bâtt-ı sahîh-i şer‘î ile bin altı yüz altmış altı akçeyi mezbûr Mehmed Beşeˈye bey‘ edip ol dahi iştirâ ve kabûl eyledikden sonra semeni olan meblağ-ı mezbûr bin altı yüz altmış akçeyi merkūm Mehmed Beşe yedinden tamamen alıp kabz edip mahâllinde kabzına mezbûr Mehmed Beşeˈyi taslît eyledim ba‘deˈl-yevm sâlifüˈz-zikr menzilde olan altı sehim hissem merkūm Mehmed Beşeˈnin mülk-i müşterâsıdır hasbemâ yeşâ’ mutasarrıf olsun dedikde gıbbeˈt-tasdîkiˈş-şer‘î mâ-vaka‘a biˈt-taleb ketb olundu. Fiˈr-râbi‘ min-Zilka‘detiˈş-şerîfe li-sene erba‘a ve semânîn ve elf. Şuhûdüˈl-hâl: es-Sâbıkūn