Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 575 Hüküm no: 391 Orijinal metin no: [94a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yasemin bt. Abdullah’ın, merhume Sâliha bt. Hasan’ın azatlı cariyesi olduğundan varislerin kölelik iddialarının reddedildiği Orta boylu sarışın sağ gözü kör Eflakiyyetüˈl-asl Yasemin bt. Abdullah tarafından husûs-ı câ’iˈz-zikre vekîl olup mezbûrenin zâtını ma‘rifet-i şer‘iye ile ârifân olan Mustafa Beşe b. Musa ve Osman b. Ahmed şehâdetleriyle şer‘an vekâleti sâbite olan Musa b. Mustafa meclis-i şer‘-i hatîrde medîne-i Hazret-i Ebâ Eyyûbeˈl-Ensârî muzâfâtından Ayas Ağa nâm karyeden sâkin iken bundan akdem vefât eden Sâliha bt. Hasanˈın verâseti zevc-i metrûku Mehmed Beşe ile anası Fatma bt. Halil nâm hatuna ve sagīr oğlu İbrahim ve sagīre kızı Afifeˈye münhasıra olduğu şer‘an zâhir ve müte‘ayyin oldukdan sonra kendi tarafından asâleten ve sagīrân-ı mezbûrânın tesviye-i umûrlarına kıbel-i şer‘den mansûb vasîleri olan babaları mezbûr Mehmed Beşe mahzarında biˈl-vekâle üzerine da‘vâ ve takrîr-i kelâm edip müvekkilem mezbûre müteveffât-ı merkūmenin câriye-i memlûkesi olup mülkünde olduğu hâlde hasbeten lillâh-i te‘âlâ mülkünden ihrâç edip tahrîr ve iʻtâk etmekle hurretüˈl-asl olmuş iken hâlâ mezkûr Mehmed Beşe bana rık olmak üzere vaz‘-ı yed murâd eder suâl olunup sebîli tahliye olunmak biˈl-vekâle matlûbumdur dedikde gıbbeˈs-suâl ve akībeˈl-inkâr vekîl-i mezbûrdan müdde‘âsına beyyine taleb olundukda yine karye-i mezbûreden Hüseyin b. Ahmed ve Mustafa b. Abdullah nâm kimesneler li-ecliˈş-şehâde meclis-i şer‘a hâzıran olup isreˈl-istişhâd fiˈl-hakīka müteveffât-ı mezbûre hayatında merkūme Yaseminˈi huzûrumuzda hasbeten lillâh-i te‘âlâ mülkünden ihrâç edip tahrîr ve i‘tâk ve zümre-i harâire [94b] ilhâk eyledi biz bu husûsa şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde ba‘de ri‘âyet-i şerâ’itiˈl-kabûl şehâdetleri makbûle oldukdan sonra mûcebiyle mezkûre Yaseminˈin ıtkına ba‘deˈl-hükm mâ vaka‘a biˈt-taleb ketb olundu. Fiˈl-âşir min-Zilkaʻdetiˈş-şerîfe li-sene erba‘a ve semânîn ve elf. Şuhûdüˈl-hâl: Abdülaziz Efendi el-müderris, Ömer Efendi b. Ali, el-Hâc Mahmud b. Mehmed, Osman b. Mahmud, Ramazan Beşe er-râcil, Ali Beşe