Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 761 Hüküm no: 990 Orijinal metin no: [117b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Şahin b. Abdullah’ın dört sene önce Mehmed Reis b. Ali tarafından âzat edildiği Rıkk-ı sâbıkını mu‘terif olan işbu orta boylu, açık kaşlı, elâ gözlü Rûsiyyü’l-asl Şahin b. Abdullah nâm kimesne meclis-i şer‘de rakīki olmak üzre kendiye vâzı‘ü’l-yed olan Cezâyirli Mehmed Reis b. Ali mahzarında üzerine da‘vâ ve takrîr-i kelâm edip mezbûr Mehmed Reis abd-i memlûkü olduğum hâlde beni tedbîr-i mutlak ile müdebber ettiğinden sonra târih-i kitâbdan dört sene mukaddem malından i‘tâk ve zümre-i ahrâr-ı asliyyîne idrâc ve ilhâk edip hattâ ikrâr dahi etmişiken rakīk üzre bi gayrı hakkın bana vaz‘-ı yed eder suâl olunup üzerimden yed-i mubtılası kasr ve izâle ve sebîlim tahliyye olunmak matlûbumdur dedikde gıbbe’s-suâl ve’l-inkâr müdde‘î-i mezbûrdan müdde‘âsını mübeyyine beyyine taleb olundukda mahmiye-i İstanbul’da Molla Gürânî mahallesi sükkânından el-Hâc Cafer Ağa b. Hüseyin ve kasaba-i Kasım Paşa’da Uzun Piyâle Paşa sarayı kurbunda sâkin Ali b. Ahmed ve Gemici tâifesinden Tekfûrdağlı Yazıcı Mustafa Çelebi b. Mehmed ve Diyarbekirli Mehmed b. Ali nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-hakīka mezbûr Mehmed Reis mevsûf-ı mezbûru târih-i kitâbdan dört sene mukaddem âzâd ettiğini bizim huzûrumuzda mukaddemâ ikrâr ve bizi işhâd etmişidi biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye ettiklerinde şuhûd-ı mezbûrenin keyfiyyet-i hâlini suâl için küttâb-ı mahkemeden Sofu Mehmed Efendi ile huddâmdan Veli b. Mahmud nâm kimesne irsâl olunup anlar dahi şuhûd-ı mezbûrenin ahvâlini âlim olan Abdullah Efendi b. Himmet Efendi ve Ali Çelebi b. Hasan ve el-Hâc Hüseyin b. Osman ve el-Hâc Ramazan b. Himmet ve el-Hâc Hasan b. Abdullah ve Mehmed b. Mehmed ve Ali b. Abdullah ve el-Hâc Hasan b. Abdullah ve Ali b. Abdullah ve el-Hâc Mübârek b. Mübârek nâm kimesnelerden şuhûd-ı mezbûrenin keyfiyyet-i hâli[ni] suâl ettiklerinde her biri adl velev aleynâ makbûlü’ş-şehâdedirler deyû haber verdiklerini mevlânâ-yı mezbûr mahallinde tahrîr ba‘dehû mezbûr Veli ile meclis-i şer‘a gelip alâ vukū‘ihî inhâ ve takrîr etmeleri ile alenen ve ba‘dehû sırren ta‘dîl ve tezkiyye olunduklarından sonra şehâdetleri makbûle olmağın mûcebince mevsûf-ı mezbûrun hürriyetine hükm ve sebîli tahliyye olunup üzerinden kasr-ı yedine mezbûr Mehmed Reis’e tenbîh olunmağın mâ hüve’l-vâki‘ bi’t-taleb ketb olundu. Fi’l-yevmi’l-hâmis min Şevvâli’l-mükerrem li sene seb‘a ve seb‘în ve elf. Şuhûdü’l-hâl: Umdetü’l-eşbâh Eyüb Ağa b. ( ) Kethüdâ-yı Hazret, fahrü’l-akrân Hasan Beşe b. Abdullah Çukadâr, Abdullah Çavuş el-Mübâşir, İbrahim Çelebi b. Ahmed.