Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 762 Hüküm no: 991 Orijinal metin no: [117b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. el-Hâc Mehmed Ağa ile kızı Âişe’ye ait vakıf evin mütevelli izni ile İbrahim Ağa’ya devredildiği Mahmiye-i İstanbul’da Kabasakal Sinan mahallesi ahâlîsinden iken bundan akdem vefât eden Arslan Ağa b. Abdullah’ın kebîr oğlu el-Hâc Mehmed Ağa ile kebîre kızı Âişe nâm hâtun meclis-i şer‘-i şerîfde hâlâ Kiler-i hâssa kethüdâsı olan umdetü’l-emâsil ve’l-eşbâh bâ‘isü’l-kitâb İbrahim Ağa tarafından husûs-ı âti’l-beyâna vekîl olduğu İbrahim Bey b. Musa ve Ahmed Bey b. Ebûbekir nâm kimesneler şehâdetleri ile şer‘an sâbit olup hâssa helvacılarından olan fahrü’l-akrân Hüseyin Bey b. Abdurrahman mahzarında her biri ikrâr ve takrîr-i kelâm edip merhûm Yahya Çelebi vakfı’ndan olup mahalle-i mezbûrede vâki‘ iki tarafdan Âişe Sultan vakfı ve bir tarafdan Murad Çelebi mülkü ve bir tarafdan tarîk-i âm ile mahdûd hâricen ve dâhilen fevkānî ve tahtânî büyût-ı adîde ve bir hamam ve bir mahzen ve iki hadîka ve üç ahır ve kenîf ve tarîk-i âm tarafında beş bâb dükkânları müştemil olup müteveffâ-yı mezbûrdan intikāl-i âdî ile intikāl etmekle ale’l-iştirâki’s-seviy icâre-i mu‘accele ve ayda üç yüz akçe ücret-i müeccele ile tasarrufumuzda olan menzilimizin hakk-ı tasarrufunu vekîl-i mezbûr Hüseyin Bey’e altı bin esedî guruş bedel mukābelesinde vakf-ı mezbûr mütevellîsi Ahmed Bey’in izni ile ferâğ ve tefvîz ve teslîm edip ol dahi müvekkil-i müşârün-ileyh İbrahim Ağa için tefevvuz ve tesellüm ettiğinden sonra bedel-i mezbûr altı bin esedî guruşu vekîl-i mezbûr Hüseyin Bey yedinden tamâmen ahz u kabz eyledik, min ba‘d menzil-i mahdûd-ı mezbûr müvekkil-i müşârün-ileyh İbrahim Ağa’nın hakk-ı müfevvazıdır emsâli gibi mutasarrıf olsun dediklerinde gıbbe’t-tasdîk mâ hüve’l-vâki‘ bi’t-taleb ketb olundu. Fi’l-yevmi’s-sâdis min Şevvâli’l-mükerrem li sene seb‘a ve seb‘în ve elf. Şuhûdü’l-hâl: Umdetü’l-emsâl ve’l-a‘yân Kapıağası Ali Ağa, fahrü’l-müderrisîn Yusuf Efendi, zahrü’l-akrân el-Hâc Mustafa Ağa, zahrü’l-emsâl Mehmed Ağa el-Yesârî, fahrü’l-akrân Mumcu Bâşezâde Ahmed Çelebi, fahrü’l-küttâb Hasan Efendi, zahrü’l-a‘yân el-Hâc Halil Ağa, zahrü’l-emsâl Abdullah Çelebi b. Süleyman Efendi, helvacı Ahmed Bey, Cündî Ahmed Bey.