Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 763 Hüküm no: 993 Orijinal metin no: [118a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hatice bt. Mehmed Efendi’nin, Fâtıma Hatun’a câriye satışı davasında sulh yoluyla anlaştıkları Mahmiye-i İstanbul’da Çıkrıkçı Kemal mahallesi sâkinelerinden fahrü’l-muhadderât Fâtıma Hâtun bt. hazret-i Mesud Efendi tarafından husûs-ı âti’l-beyâna vekîl olduğu zâtını ma‘rifet-i şer‘iyye ile ârifân Mustafa Efendi b. ( ) ve Murtaza Efendi b. Mehmed nâm kimesneler şehâdetleriyle şer‘an sâbit olan fahrü’l-müderrisîni’l-kirâm Mehmed Efendi b. İsmail meclis-i şer‘-i şerîfde mahmiye-i mezbûrda Horhor kurbunda sâkine Hatice bt. Mehmed Efendi nâm hâtun tarafından husûs-ı âti’l-beyâna vekîl olduğu Yahya Çelebi b. Sâlih Ağa ve İsa Beşe b. Mehmed nâm kimesneler şehâdetleriyle şer‘an sâbit olan Yusuf Beşe b. Abdullah mahzarında ikrâr ve takrîr-i kelâm edip müvekkile-i mezbûre Hatice işbu orta boylu, açık kaşlı, gök elâ gözlü Rûsiyyetü’l-asl Muazzez bt. Abdullah’ı yedinde mülkü olduğu hâlde târih-i kitâbdan üç ay mukaddem üç yüz on beş esedî guruşa müvekkilem mezbûre Fâtıma’ya bikr olmağla bey‘ ve teslîm ve kabz-ı semen ettiğinden sonra müvekkilem mezbûre Fâtıma ba‘de’l-iştirâ ve’t-tesellüm mevsûfe-i mezbûreyi bikr olmamağla müvekkile-i mezbûre Hatice’ye red murâd ettiğinde mezbûre Hatice dahi bikr olmak üzre bey‘ ettiğini inkâr etmekle beynlerinde nizâ‘-ı küllî vukū‘undan sonra muslihûn tavassut edip müvekkilem mezbûre Hatice beynlerinde yüz beş esedî guruş üzerine inşâ-i akd-i sulh ettiklerinde müvekkilem mezbûre Fâtıma dahi sulh-i mezbûru kabûl ve bedel-i sulh olan meblağ-ı mezbûr yüz beş esedî guruşu ahz u kabz ettiğinden sonra husûs-ı mezbûra müte‘allika da‘vâdan her biri âharın zimmetini ibrâ-i âmm-ı kātı‘ü’n-nizâ‘la ibrâ ve iskāt eyledi dedikde gıbbe’t-tasdîk mâ vaka‘a bi’t-taleb ketb olundu. Fi’l-yevmi’l-ışrîn min şehri Ramazâni’l-mübârek li sene seb‘a ve seb‘în ve elf. Şuhûdü’l-hâl: İbrahim Çelebi b. Mehmed, Hasan Çelebi b. Ahmed, Veli Çelebi b. Mahmud, Mehmed Efendi b. İsmail.