Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 764 Hüküm no: 994 Orijinal metin no: [118a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hâkime bt. Hasan’ın, el-Hâc Mustafa b. el-Hâc Osman’dan muhâlaa yoluyla boşandığı Mahmiye-i İstanbul’da Mi‘mâr İlyas mahallesi sâkinelerinden Hâkime bt. Hasan nâm hâtun meclis-i şer‘-i şerîf-i lâzımü’t-teşrîfde zevci işbu bâ‘isü’l-kitâb el-Hâc Mustafa b. el-Hâc Osman mahzarında ikrâr ve takrîr-i kelâm edip zevcim mezbûr el-Hâc Mustafa zimmetinde mütekarrir ve ma‘kūdun-aleyh olan beş bin akçe mehr-i müeccelim ve nafaka-i iddet-i mu‘ayyenemden fâriğa olup ve me’ûnet-i süknâm dahi kendi üzerime olmak üzre ve eşyâ-i memlûkemden bin akçe kıymetli bir al kaftanım bedel-i hul‘ olmak üzre zevcim mezbûr el-Hâc Mustafa ile muhâla‘a-i sahîha-i şer‘iyye ile muhâla‘a edip ol dahi hul‘-ı mezbûru kabûl eyledikden sonra zevciyyete müte‘allika âmme-i da‘vâdan her birimiz âharın zimmetini ibrâ-i âm ile ibrâ ve iskāt eyledik dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâmin min Şevvâli’l-mükerrem li sene seb‘a ve seb‘în ve elf. Şuhûdü’l-hâl: Abdüllatîf Efendi b. Abdülkerim el-İmâm, Musa Halîfe b. Osman el-Müezzin, el-Hâc Hüseyin b. Hasan, İsmail b. İbrahim, Ali b. Abdülkerim.