Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 764 Hüküm no: 995 Orijinal metin no: [118a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hüseyin Çavuş b. Mehmed’in, ev hissesini Muammer bt. Abdullah’a sattığı Vilâyet-i Rumeli’nde Nevrekob kazâsına tâbi‘ Veterme nâm karye ahâlîsinden Hüseyin Çavuş b. Mehmed nâm kimesne meclis-i şer‘de mahmiye-i İstanbul’da Hayreddin Bey mahallesinde sâkine bâ‘isetü’l-kitâb Muammer bt. Abdullah nâm hâtunun zevci tarafından husûs-ı âti’l-beyâna vekîl olduğu zâtını ma‘rifet-i şer‘iyye ile ârifân olan Mehmed Efendi b. Ahmed ve Süleyman Ağa b. Mahmud nâm kimesneler şehâdetleriyle şer‘an sâbit olan Receb Ağa b. Mustafa nâm kimesne mahzarında ikrâr ve takrîr-i kelâm edip südüsü benim ve hamse-i esdâsı müvekkile-i mezbûre ile sagīr oğlu Mehmed’in mülk-i mevrûsu olup mahalle-i mezbûrede vâki‘ iki tarafından tarîk-i âm ve bir tarafdan umdetü’l-mevâli’l-kirâm Bâli Efendi menzili ve bir tarafdan Medîne-i Münevvere vakfı ile mahdûd muhavvata-i hâriciyyesinin tabaka-i ulyâsında iki bâb oda ve bir sofa ve tabaka-i vustâsında iki bâb oda ve altlarında bir ahır ve muhavvata-i dâhiliyyesinin tabaka-i ulyâsında iki bâb oda ve bir sofa ve bir tahta-pûş ve tabaka-i vustâsında iki bâb oda ve altlarında bir matbah ve bir kiler ve bir su kuyusu ve havlu ve kenîfi müştemil menzilden vech-i muharrer üzre hissem olan südüs-i şâyi‘ini müvekkile-i mezbûre Muammer’e tarafeynden îcâb ve kabûlü hâvî şurût-ı müfsideden ârî bey‘-i bâtt-ı şer‘î ile kırk yedi bin beş yüz akçeye bey‘ ve teslîm edip ol dahi iştirâ ve tesellüm ettiğinden sonra semen-i mezbûr kırk yedi bin beş yüz akçeden müvekkile-i mezbûre Muammer’in zimmetini ibrâ-i âmm-ı kātı‘ü’n-nizâ‘ ile ibrâ ve iskāt eyledim min ba‘d menzil-i mahdûd-ı mezbûrun südüs-i şâyi‘i müvekkile-i mezbûre[nin] mülk-i müşterâsıdır keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâdis min Şevvâli’l-mükerrem li sene seb‘a ve seb‘în ve elf. Şuhûdü’l-hâl: Receb Efendi b. Mehmed sâkin-i mahalle-i Acımusluk, Ahmed Efendi b. el-Hâc Hasan, Hasan Çelebi b. Ahmed, Mehmed Çelebi b. Ali, Siyavuş b. Abdullah.