Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 765 Hüküm no: 996 Orijinal metin no: [118a-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Havva bt. Abdi’nin, Ali Beşe b. Oruç’tan muhâlaa yoluyla boşandığı Mahmiye-i İstanbul’da Hoca Kasım Gönânî mahallesi sâkinelerinden Havva bt. Abdi nâm hâtun meclis-i şer‘-i şerîf-i Ahmedî ve mahfil-i dîn-i münîf-i Muhammedî’de işbu bâ‘isü’l-kitâb zevci Ali Beşe b. Oruc mahzarında ikrâr ve takrîr-i kelâm edip zevcim mezbûr Ali Beşe zimmetinde mütekarrir ve ma‘kūdun-aleyh olan altı bin akçe mehr-i müeccelim ve nafaka-i iddet-i ma‘lûmem üzerlerine ve me’ûnet-i süknâm dahi kendi üzerime olmak üzre zevcim mezbûr Ali Beşe ile muhâla‘a-i sahîha-i şer‘iyye ile muhâla‘a edip ol dahi hul‘-ı mezbûru kabûl eyledikden sonra zevciyyete ve târih-i kitâba gelince beynimizde cârî olan ahz ve i‘tâ ve mu‘âmelât-ı şettâya müte‘allika da‘vâdan her birimiz âharın zimmetini ibrâ-i âmm-ı kātı‘ü’n-nizâ‘la ibrâ ve iskāt eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâbi‘ min Şevvâli’l-mükerrem li sene seb‘a ve seb‘în ve elf. Şuhûdü’l-hâl: Osman Efendi b. Mehmed el-İmâm, Mehmed Ağa b. Osman, Hüseyin Efendi [b.] Abdülmümin, İsmail Çelebi b. Mehmed, Mehmed Beşe b. Mustafa, el-Hâc Ahmed b. Ömer.