Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 668 Hüküm no: 471 Orijinal metin no: [111a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Serkis v. Karaca’nın, merhum Bayram Bey’deki kereste bahasından alacağını vasî Şaban Halife’den talep ettiği Mahmiye-i Galataˈya tâbi‘ Kasımpaşaˈda Efrençe Ahmed Ağa odalarında sâkin işbu hâmilüˈs-sifr Serkis v. Karaca nâm Ermeni mahfil-i kazâda mahmiye-i mezbûrede vâki‘ Saray-ı Sultânî teberdârları kethudâsı iken bundan akdem vefât eden Bayram Beyˈin evlâd-ı sıgārının tesviye-i umûrları’çün kıbel-i şer‘den mansûb vasîleri olmağla muhallefâtına vâzi‘uˈl-yed olduğu şer‘an sâbit olan Şa‘bân Halîfe b. Hüseyin mahzarında üzerine da‘vâ ve takrîr-i kelâm edip müteveffâ-yı mezbûr sıhhat-i hâlinde yedimden müşterâ ve makbûz beynimizde mikdârı ma‘lûm keraste bahâsından ve neccâriyeden zimmetinde müctemi‘ doksan esedî guruş kableˈl-ahz vefât etmeğin hâlâ tereke-i vâfiyesinden vermek üzere vasî-i mezbûrdan taleb ederim suâl olunsun dedikde gıbbeˈs-suâl veˈl-inkâr müdde‘î-i mezbûrdan da‘vâsına mutâbık beyyine taleb olundukda [taleb olundukda] udûlden Mehmed b. Abdullah ve İbrahim Zevar nâm kimesne li-ecliˈş-şehâde hâzırân biˈl-meclis olup isreˈl-istişhâd fiˈl-vâki‘ müteveffâ-yı mezbûr sıhhati hâlinde zikri sebk eden keraste bahâsından ve neccâriyeden mezbûr tereke zimmetimde müctemi‘ doksan kıt‘a esedî guruş deynimdir deyü bizim huzûrumuzda ikrâr edip bizi işhâd eyledi biz bu husûsa şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde gıbbe ri‘âyet-i şerâ’itiˈl-kabûl şehâdetleri makbûle olmağın ba‘deˈt-tahlîfiˈş-şer‘î mûcebiyle vasî-i mezbûra tenbîh olunup mâ vaka‘a biˈt-taleb ketb olundu. Fiˈl-yevmiˈl-âşir min-Muharremiˈl-harâm li-sene hamse ve semânîn ve elf. Şuhûdüˈl-hâl: el-Hâc Süleyman b. Abdullah, el-Hâc Mustafa b. Abdullah, Mehmed b. Abdullah ve gayruhum mineˈl-huzzâr.