Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 766 Hüküm no: 997 Orijinal metin no: [118a-6] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ramazan Beşe’nin Mehmed ve Sâlih b. Lütfullah’tan satın aldığı gemiyi geri vermek istemesinin reddi Gemici tâifesinden Ramazan Beşe b. Mahmud nâm kimesne meclis-i şer‘-i şerîf-i lâzımü’t-teşrîfde Mehmed ve Sâlih ibney Lütfullah nâm şerîkler mahzarlarında üzerlerine da‘vâ ve takrîr-i kelâm edip mezbûrân Mehmed ve Sâlih târih-i kitâbdan altmış gün mukaddem ale’l-iştirâki’s-seviy yedlerinde mülkleri olup mahrûse-i Galata’da Kalafatyeri demekle ma‘rûf iskelede merbût şayka ta‘bîr olunur gemiyi yirmi altı zirâ‘dır deyû bana bin yüz kıt‘a esedî guruşa bey‘ ve teslîm ve kabz-ı semen etmişleridi hâlâ mârrü’z-zikr gemiyi mesâha eylediğimde yirmi beş zirâ‘ gelmişdir suâl olunup mûceb-i şer‘îsi icrâ olunmak matlûbumdur dedikde, gıbbe’s-suâl [118b] mezbûrân Mehmed ve Sâlih cevâblarında fi’l-vâki‘ târih-i mezbûrda semen-i mezkûra mârrü’z-zikr gemiyi vech-i muharrer üzre müdde‘î-i merkūma bey‘ ve teslîm ve kabz-ı semen eylediğimizden sonra mezbûr Ramazan Beşe mârrü’z-zikr gemiyi vech-i meşrûh üzre mesâha edip yirmi beş zirâ‘ geldikden sonra kabûl edip kalafata yatırıp bir âhar iskeleye götürmüşdü deyû def‘le mukābele ettiklerinde gıbbe’l-istintâk ve’l-inkâr mezkûrân Mehmed ve Sâlih’den def‘-i mezbûrlarını mübeyyine beyyine taleb olundukda ityân-ı beyyineden izhâr-ı acz edip istihlâf ettiklerinde fi’l-vâki‘ mârrü’z-zikr gemiyi mesâha edip yirmi beş zirâ‘ geldikden sonra vech-i meşrûh üzre kabûl etmediğine merkūm Ramazan Beşe’ye yemîn teklîf olundukda yemînden nükûl etmeğin mûcebince mezbûr Ramazan Beşe bî-vech mu‘ârazadan men‘ olunup mâ vaka‘a bi’t-taleb ketb olundu. Fi’l-yevmi’s-sâmin min Şevvâli’l-mükerrem li sene seb‘a ve seb‘în ve elf. Şuhûdü’l-hâl: Hasan Efendi b. Mehmed, Yusuf Beşe b. Abdullah el-Mübâşir, Mustafa Çelebi b. Mehmed, Musa b. Ahmed.